ပြည်သူ့လက်စွဲစာစဉ်

စာအုပ်အမည် - ''ဖူးငုံပန်းကလေးများ လန်းလန်းရွှင်ရွှင် အပြုံးဝေဝေလွင်နှင့် အခြားကလေး၀တ္ထုတိုများ''

စာရေးဆရာအမည် - ဝမ်းထက်မိုး (ဇိန့်-အောင်လံ)

တန်ဖိုး - ၁၀၀၀ကျပ်

စာညွှန်း -

''ဝမ်းထက်မိုး (ဇိန့်-အောင်လံ)'' ရေးသားသည့် ''ဖူးငုံပန်းကလေးများ လန်းလန်းရွှင်ရွှင် အပြုံးဝေဝေလွင်နှင့် အခြားကလေး၀တ္ထုတိုများ'' စာအုပ်သစ်ကို စာပေဗိမာန်က ထုတ်ဝေ ဖြန့်ချိ လိုက်ပြီ ဖြစ်ပါသည်။

အဆိုပါစာအုပ်သည် ၂ဝ၁၅ ခုနှစ်အတွက် စာပေဗိမာန်စာမူဆုပြိုင်ပွဲတွင် ကလေးစာပေ ဒုတိယဆုရ စာမူဖြစ်ပြီး စာပေဗိမာန်က ပြည်သူ့လက်စွဲ စာစဉ်အဖြစ် ထုတ်ဝေဖြန့်ချိလိုက်ခြင်း ဖြစ်သည်။

''ဖူးငုံပန်းကလေးများ လန်းလန်းရွှင်ရွှင် အပြုံးဝေဝေလွင်နှင့် အခြားကလေး၀တ္ထုတိုများ'' စာမူတွင် ကလေးများကို မှန်ကန်သော အသိအမြင် အတွေးအခေါ်များပေးထားသည့် ကလေး၀တ္ထုတို ၂၆ ပုဒ် ပါရှိသည်။ ကလေးစာပေ (စကားပြေ) တို့၏ အစဉ်အလာအတိုင်း ဇာတ်ကောင်ကလေးများ၏ လှုပ်ရှားမှု၊ ပြောဆိုမှုများ၏ စိတ်အလိုလိုက်ပြုမူဆောင်ရွက်မှုများနှင့် ယင်းတို့အပေါ် မှန်ကန်သော အမြင်ဖြင့် သုံးသပ်ကာ အသိမှန် အမြင်မှန် ရရှိစေသော ယေဘုယျ သဘောသဘာ၀တို့ကို ပီပြင်အောင်ရေးဖွဲ့ထားသည်ကို တွေ့ရသည်။

၀တ္ထုတိုတစ်ပုဒ်ချင်းတွင် ပြောလိုရာကို လိုရင်းရောက်အောင် ဇာတ်ကောင်များ၏ လှုပ်ရှားမှု၊ ပြောဆိုမှုများဖြင့် ထိမိစွာ ပို့ဆောင်နိုင်သည်။ စာမလိုက်နိုင်သူ ဉာဏ်ထုံထိုင်းသူ၊ ကိုယ်အင်္ဂါ မသန်စွမ်းသူများကို နှိမ့်ချပြောဆိုခြင်း၊ အထင်သေးခြင်း မပြုဘဲ ကူညီသင်ပြပေးရန်၊ ဉာဏ်ရည် ထက်သူချင်းလည်း တရားသဖြင့် ယှဉ်ပြိုင်ကြရန် မနာလိုဝန်တိုမှု၊ မဟုန်မမှန် ကုန်းချောပြောဆိုမှု မပြုရန်၊ အချိန်ကို အကျိုးရှိစွာ အသုံးပြုရန်၊ ဆေးလိပ် မူးယစ်စသည်တို့ကို အစလုပ်စမ်းသပ်ကြည့်မှုပင် မပြုသင့်ကြောင်း စသည်ဖြင့် ဘက်စုံ ထောင့်စုံမှ သိမှတ်ဖွယ်၊ လိုက်နာဖွယ်၊ ရှောင်ကြဉ်ဖွယ် များဖြင့် သရုပ်ဖော်တင်ပြထားသည်ကို တွေ့ရသည်။

စာဖတ်သူကလေးသူငယ်တို့ လက်ခံလိုက်နာချင်လာအောင် ဆွဲဆောင်ရေးသားထားသည်ကို တွေ့ရသည်။ စကားလုံး ဝေါဟာရသုံးအနှုန်းများတွင်လည်း ကလေးတို့ နားလည်နိုင်သော အသုံးအနှုန်းတို့ဖြင့် ရေးဖွဲ့ထားသည့်စာအုပ်ကောင်းတစ်အုပ်ဖြစ်သည်။

အဆိုပါစာအုပ်ကို အမှတ် ၅၂၉-၅၃၁၊ ကုန်သည်လမ်း၊ ရန်ကုန်မြို့ (ဖုန်း ဝ၁-၂၄၉၀၃၁၊ ဝ၁-၃၈၁၄၄၈) စာပေဗိမာန်စာအုပ်ဆိုင်မှ တန်ဖိုး ၁၀၀၀ ကျပ်ဖြင့် ဖြန့်ချိပြီး နေပြည်တော် သပြေကုန်း စျေးရှိ စာပေဗိမာန်စာအုပ်ဆိုင် (ဖုန်း ဝ၆၇-၄၁၄၆၈၁)၊ မန္တလေးမြို့  ၈၆ လမ်း (၂၁ လမ်းနှင့် ၂၂ လမ်းကြား) ရှိ စာပေဗိမာန်စာအုပ်ဆိုင် (ဖုန်း ဝ၂-၃၀၁၈၆) တို့နှင့် အမြို့မြို့ရှိ စာပေဗိမာန် ကိုယ်စားလှယ်ဆိုင်များတွင် ဝယ်ယူရရှိနိုင်ပါသည်။ လက်ကားမှာယူလိုပါက အမှတ် ၅၂၉-၅၃၁၊ ကုန်သည်လမ်း၊ ရန်ကုန်မြို့ (ဖုန်း ဝ၁-၂၄၉၀၃၁၊ ဝ၁-၃၈၁၄၄၈) စာပေဗိမာန် စာအုပ်ဆိုင်သို့ ဆက်သွယ်နိုင်ကြောင်း သိရသည်။