ရွှေသွေးဂျာနယ်

ပြန်ကြားရေးဝန်ကြီးဌာန၊ ပုံနှိပ်ရေးနှင့် ထုတ်ဝေရေးဦးစီးဌာန၊ စာပေဗိမာန်ရုံးသည် အသက် (၁၂) နှစ်အောက် ကလေးငယ်များ ဖတ်ရှုနိုင်ရန် ရည်ရွယ်၍ ရွှေသွေးဂျာနယ်ကို အပတ်စဉ် စနေနေ့တိုင်း ထုတ်ဝေလျက်ရှိရာ ၂၀၂၀ ပြည့်နှစ်၊ ဇူလိုင် ၁၈ ရက် (စနေနေ့) တွင် ထွက်ရှိမည့် ရွှေသွေးဂျာနယ်  အတွဲ(၅၂)၊ အမှတ်(၂၉)၌ ကြွက်ညိုလေးနှစ်ကောင်၏ ဖြတ်ထိုးဉာဏ်ကောင်းပုံအကြောင်းကို တင်ဆက်ထားသည့် “ကြွက်ညိုရဲ့ အကြံ” မျက်နှာဖုံးကာတွန်း၊ ဘာသာရပ်တိုင်းတွင် အမှတ်ပြည့်ရရန် ကစားချိန်လျှော့ပြီး စာကျက်ချိန်တိုးရမည်ဖြစ်ကြောင်း အမြင်မှန်ရသွားသော ကျောင်းသားလေး တစ်ယောက်အကြောင်းကို ရေးဖွဲ့ထားသည့် “ဖိုးကတုံး” နှစ်မျက်နှာကာတွန်း၊ ကျောင်းစာကို နေ့စဉ်ပုံမှန်လုပ်ဆောင်ပြီး အားကစားကိုလည်း မှန်မှန်ဆောင်ရွက်ပါက မိမိ၏လေ့လာသင်ကြားမှုတွင် ကောင်းစွာအထောက်အကူရနိုင်ပုံအကြောင်းကို ရေးဖွဲ့ထားသည့် “ဖိုးလပြည့်” နှစ်မျက်နှာ ကာတွန်း၊ ကလေးတို့အနေဖြင့် လူကြီးမိဘများက ညွှန်ကြားပေးသော စာပေကောင်းများကို လေ့လာဖတ်ရှု မှတ်သားသင့်ပုံအကြောင်းကို ရေးဖွဲ့ထားသည့် “အလိမ္မာစာမှာရှိ” တစ်မျက်နှာကာတွန်းနှင့် ကျောင်းဆရာ ဦးအောင်ကြီး၏ အမေးကို ဖြေကြားလိုက်သော ကျောင်းသားလေး တစ်ယောက် အကြောင်းကို ရေးဖွဲ့ထားသည့် “ဥယျာဉ်မှူးနှင့် သူ၏ပန်းကလေးများ” တစ်မျက်နှာဟာသကာတွန်း တို့ကို တင်ဆက်ထားပါသည်။

သုတကဏ္ဍအနေဖြင့် မြန်မာ့ကျေးလက်ဒေသများတွင် အသုံးပြုနေကြဆဲဖြစ်သော ရိုးရာအမွေအနှစ်တစ်ခုဖြစ်သည့် တုံးမောင်း (သို့မဟုတ်) အုန်းမောင်းအကြောင်းကို ကလေးတို့ ဗဟုသုတဖြစ်ဖွယ်တင်ဆက်ထားပါသည်။  ပုံပြင်ကဏ္ဍတွင် မိမိတတ်မြောက်ထားသော ပညာရပ်ကို နည်းမှန်လမ်းမှန် အသုံးမချတတ်ပါက ဘေးဒုက္ခနှင့် ကြုံတွေ့ရပြီး အသက်အန္တရာယ်အထိပါ စိုးရိမ်ရကြောင်းကို ဖတ်ရှုရမည်ဖြစ်ပါသည်။  ထို့ပြင် ကိုဗစ်-၁၉ ရောဂါကာကွယ်၊ ထိန်းချုပ်၊ ကုသရေး ဆိုင်ရာ ဆောင်ရွက်ချက်များကို အရှိန်အဟုန်မြှင့်ဆောင်ရွက်နိုင်ရန် ကိုဗစ်-၁၉ Call Center များ ဖွင့်လှစ်ထားရှိပုံအကြောင်းကို တင်ဆက်ထားသည့် ကျန်းမာရေးဆိုင်ရာ အသိပေးချက်ကဏ္ဍနှင့် ပေးထားသောရုပ်ပုံကိုကြည့်၍ ကလေးတို့ကိုယ်တိုင် ပါဝင်ရေးခြယ်နိုင်မည့် ဆေးရောင် လှလှခြယ်ကြမယ်ကဏ္ဍနှင့် မြန်မာနိုင်ငံလွတ်လပ်ရေးကြိုးပမ်းမှုသမိုင်းတွင် အသက်စွန့်ကြိုးပမ်း အားထုတ်ပေးခဲ့ကြသော အာဇာနည်ခေါင်းဆောင်ကြီးများအား ဂုဏ်ပြုရေးဖွဲ့ထားသော ကဗျာကဏ္ဍ တို့ကို တင်ဆက်ထားပါသည်။ အင်္ဂလိပ်စာကဏ္ဍအနေဖြင့် ဝါကျအတွင်း Phrasal Verb အသုံးပြုခြင်းနှင့် ပတ်သက်၍ သင်ခန်းစာသစ်အချို့ကို ကလေးတို့ လေ့လာမှတ်သားနိုင်မည် ဖြစ်ပါသည်။

ရွှေသွေးဂျာနယ်ကို ကိုယ်စားလှယ်အဖြစ် မှာယူဖြန့်ချိလိုပါက တစ်စောင်လျှင် ၂၅၀ ကျပ်နှုန်းဖြင့် စာပေဗိမာန်အရောင်းဌာနစု၊ အမှတ် (၅၂၉-၅၃၁)၊ ကုန်သည်လမ်း၊ ရန်ကုန်မြို့၊ ဖုန်း ၀၁-၃၈၁၄၄၈၊ ၀၁-၂၄၉၀၃၁ သို့ ဆက်သွယ်မှာယူနိုင်ပါသည်။