ဆက်စပ် စာအုပ်များ
ရွှေသွေးဂျာနယ်
(၄-၇-၂၀၂၀) ရက်ထုတ် ရွှေသေွးဂျာနယ် အတွဲ (၅၂)၊ အမှတ် (၂၇) ထွက်ရှိ
တန်ဖိုး - ၂၅၀ကျပ်
ပြန်ကြားရေးဝန်ကြီးဌာန၊ ပုံနှိပ်ရေးနှင့် ထုတ်ဝေရေးဦးစီးဌာန၊ စာပေဗိမာန်ရုံးသည် အသက် (၁၂) နှစ်အောက် ကလေးငယ်များ ဖတ်ရှုနိုင်ရန် ရည်ရွယ်၍ ရွှေသွေးဂျာနယ်ကို အပတ်စဉ် စနေနေ့တိုင်း ထုတ်ဝေလျက်ရှိရာ ၂၀၂၀ ပြည့်နှစ်၊ ဇူလိုင် ၄ ရက် (စနေနေ့) တွင် ထွက်ရှိမည့် ရွှေသွေးဂျာနယ် အတွဲ(၅၂)၊ အမှတ်(၂၇)၌ ရုပ်အဆင်းအလှအပထက် စိတ်ထားလှခြင်းက လူကိုပို၍လှပစေကြောင်း ရေးဖွဲ့ထားသည့် “အလှ” မျက်နှာဖုံးကာတွန်း၊ ကျောင်းသားလေး ပေါက်ကျော်သည် ပညာရေးမှူးအား သူ၏နာမည် မိတ်ဆက်ပုံအကြောင်းကို ရေးဖွဲ့ထားသည့် “ပေါက်ကျော်ပါဝင်သည့် ဆရာကြီး” နှစ်မျက်နှာဟာသကာတွန်း၊ ကလေးတို့အနေဖြင့် ပညာသင်ကြားနေသည့်အရွယ်တွင် ကျောင်းသင်ခန်းစာများအပြင် မြန်မာ့ရိုးရာ သိုင်းပညာကိုပါ သင်ကြားထားသင့်ပုံအကြောင်းကို ပညာပေးရေးဖွဲ့ထားသည့် “ဆုရတီအောင်- လျှော့မတွက်နဲ့” နှစ်မျက်နှာကာတွန်းနှင့် တိရစ္ဆာန်လေးအပေါ် သနားကြင်နာတတ်သည်ဆိုသော ညီပုအကြောင်းကို ဟာသဖြစ်ဖွယ် ရေးဖွဲ့ထားသည့် “ညီပု” တစ်မျက်နှာကာတွန်းတို့ကို တင်ဆက်ထားပါသည်။
သုတကဏ္ဍတွင် သဘာဝပတ်ဝန်းကျင်ထိန်းသိမ်းရေးဆောင်ရွက်ရာတွင် သတိပြုလိုက်နာအပ်သော နီတိများအကြောင်းကို ကလေးတို့ ဗဟုသုတဖြစ်ဖွယ် ဖတ်ရှုရမည်ဖြစ်ပါသည်။ ပုံပြင်ကဏ္ဍအနေ ဖြင့် လူစွမ်းကောင်းပြိုင်ပွဲတွင် နွားကျောင်းသားလေး မောင်လမ်းက အနိုင်ရရှိသွားပုံအကြောင်းကို ပညာပေးတင်ဆက်ထားပါသည်။ ထို့ပြင် ကိုဗစ်-၁၉ ရောဂါကာကွယ်၊ ထိန်းချုပ်၊ ကုသရေးဆိုင်ရာ ဆောင်ရွက်ချက်များကို အရှိန်အဟုန်မြှင့် ဆောင်ရွက်နိုင်ရန် ကိုဗစ်-၁၉ Call Center များ ဖွင့်လှစ်ထားရှိပုံအကြောင်းကို တင်ဆက်ထားသည့် ကျန်းမာရေးဆိုင်ရာ အသိပေးချက် ကဏ္ဍ၊ ပေးထားသောရုပ်ပုံများထဲတွင် မတူညီသော အချက်များကို ကလေးတို့ လျင်လျင်မြန်မြန် ရှာဖွေနိုင်မည့် “ဘယ်သူမျက်စိပိုလျင်သလဲ”ကဏ္ဍနှင့် ကိုဗစ်-၁၉ ရောဂါ ကူးစက်ခြင်းမှ ကာကွယ် တားဆီးနိုင်ရန် အတွက် လိုက်နာကျင့်သုံးရမည်ဖြစ်သော အချက်အချို့အကြောင်းကို သရုပ်ဖော်ပုံများနှင့်အတူ တင်ဆက်ထားသည့် “ကိုဗစ်-၁၉ ရောဂါ ကာကွယ်ပါ” ကဗျာကဏ္ဍတို့ကို တင်ဆက်ထားပါသည်။ အင်္ဂလိပ်စာကဏ္ဍအနေဖြင့် ဝါကျအတွင်း Verbs with Preposition အသုံးနှင့်ပတ်သက်၍ အင်္ဂလိပ်စာဝါကျ တည်ဆောက်ပုံအချို့ကို ကလေးတို့ လေ့လာမှတ်သားနိုင်မည် ဖြစ်ပါသည်။
ရွှေသွေးဂျာနယ်ကို ကိုယ်စားလှယ်အဖြစ် မှာယူဖြန့်ချိလိုပါက တစ်စောင်လျှင် ၂၅၀ ကျပ်နှုန်းဖြင့် စာပေဗိမာန်အရောင်းဌာနစု၊ အမှတ် (၅၂၉-၅၃၁)၊ ကုန်သည်လမ်း၊ ရန်ကုန်မြို့၊ ဖုန်း ၀၁-၃၈၁၄၄၈၊ ၀၁-၂၄၉၀၃၁ သို့ ဆက်သွယ်မှာယူနိုင်ပါသည်။
