ရွှေသွေးဂျာနယ်

ပြန်ကြားရေးဝန်ကြီးဌာန၊ ပုံနှိပ်ရေးနှင့် ထုတ်ဝေရေးဦးစီးဌာန၊ စာပေဗိမာန်ရုံးသည် အသက် (၁၂) နှစ် အောက် ကလေးငယ်များ ဖတ်ရှုနိုင်ရန် ရည်ရွယ်၍ ရွှေသွေးဂျာနယ်ကို အပတ်စဉ် စနေနေ့တိုင်း ထုတ်ဝေလျက်ရှိရာ ၂၀၂၀ ပြည့်နှစ်၊ ဇွန်လ ၆ ရက် (စနေနေ့) တွင် ထွက်ရှိမည့် ရွှေသွေးဂျာနယ် အတွဲ(၅၂)၊ အမှတ်(၂၃)၌ အိပ်မက်ထဲတွင် ရန်ကုန်မြို့သို့ အလည်ရောက်နေသော ဖိုးချွန်းနှင့် ဝိတ်ပေါ အကြောင်းကို ရေးဖွဲ့ထားသည့် “ဖိုးချွန်း၊ ဝိတ်ပေါနှင့် အဆာပြေရေတစ်ခွက်” မျက်နှာဖုံးကာတွန်း၊ မိမိနိုင်ငံ၏ တန်ဖိုးရှိသော ရှေးဟောင်းပစ္စည်းများကို မပျောက်မပျက်စေရန် ကာကွယ် ထိန်းသိမ်းရမည် ဖြစ်ကြောင်း ပညာပေးတင်ဆက်ထားသည့်  “ဂန္ထဝင်ခင်ခင်ပြူးနှင့် အပေါင်းအသင်းများ” နှစ်မျက်နှာ ကာတွန်း၊ ဖိုးသန့်လေး၏ ခန္ဓာကိုယ်ထွားကြိုင်းအောင် အစားများများစားသင့်ပုံ အကြောင်းကို ရေးဖွဲ့ထားသည့် “ဖိုးသန့်လေး” နှစ်မျက်နှာကာတွန်း၊ ညီပုနှင့် နီကြောင်တို့၏ ဗလကြီးအား မုန့်ဝယ်ကျွေးခိုင်းပုံအကြောင်း ရေးဖွဲ့ထားသည့်  “ညီပု” တစ်မျက်နှာကာတွန်းနှင့် အရေးပေါ် ကယ်ဆယ်ရေးအနေဖြင့် တောင်အောက်တွင် ရေကန်တစ်ကန် ကြိုတူးထားပုံအကြောင်း သရုပ်ဖော်ထား သည့် “ကျောက်ခေတ်ကမ္ဘာ’’ တစ်မျက်နှာကာတွန်းတို့ကို တင်ဆက်ထားပါသည်။

သုတကဏ္ဍတွင် ကမ္ဘာကျော်ကာတွန်းဇာတ်ကောင် Tom နှင့် Jerry ပါဝင်တဲ့ ကာတွန်း ဇာတ်လမ်းဖန်တီးသူများအကြောင်းကို  ဗဟုသုတဖြစ်ဖွယ် ဖတ်ရှုရမည်ဖြစ်ပါသည်။  ပုံပြင်ကဏ္ဍ အနေဖြင့် မြေကြီးကို စနစ်တကျအသုံးချတတ်ပါက ရွှေ၊ ငွေ၊ ကျောက်သံပတမြား အစရှိသည်တို့ထက် တန်ဖိုးရှိကြောင်းကို ဖတ်ရှုရမည်ဖြစ်ပါသည်။  ထို့ပြင် မဟုတ်မမှန်၊ တိကျသေချာမှုမရှိသော စကားများနှင့် သူတစ်ပါးအနှောင့်အယှက်ဖြစ်ဖွယ်ရာ စကားကို ပြောဆိုရေးသားခြင်းများ မပြုလုပ်ကြရန် တင်ဆက်ထားသည့် ပညာပေးကဏ္ဍနှင့် မိုးရာသီအချိန်တွင် တောင်သူလယ်သမား များသည် မြန်မာတို့၏ အဓိကအစားအစာဖြစ်သော ဆန်စပါးကို အချိန်မှန် တက်ညီလက်ညီ ထွန်ယက်စိုက်ပျိုးကြပုံ အကြောင်းကို ရေးဖွဲ့ထားသည့် ကဗျာကဏ္ဍတို့ကို တင်ဆက်ထားပါသည်။ အင်္ဂလိပ်စာကဏ္ဍတွင် ဝါကျအတွင်း V-ing phrase နှင့် infinitive အသုံးနှင့် ပတ်သက်၍ အင်္ဂလိပ်စာဝါကျ တည်ဆောက်ပုံ အချို့ကို လေ့လာမှတ်သားနိုင်မည် ဖြစ်ပါသည်။

ရွှေသွေးဂျာနယ်ကို ကိုယ်စားလှယ်အဖြစ် မှာယူဖြန့်ချိလိုပါက တစ်စောင်လျှင် ၂၅၀ ကျပ်နှုန်းဖြင့် စာပေဗိမာန်အရောင်းဌာနစု၊ အမှတ် (၅၂၉-၅၃၁)၊ ကုန်သည်လမ်း၊ ရန်ကုန်မြို့၊ ဖုန်း ၀၁-၃၈၁၄၄၈၊ ၀၁-၂၄၉၀၃၁ သို့ ဆက်သွယ်မှာယူနိုင်ပါသည်။