ရွှေသွေးဂျာနယ်

(၂၀ - ၇ - ၂၀၁၉) ရက်ထုတ် ရွှေသွေးဂျာနယ် အတွဲ (၅၁)၊ အမှတ် (၂၉) ထွက်ရှိသတင်းနှင့် e-Book

တန်ဖိုး - ၂၅၀ကျပ်

ပြန်ကြားရေးဝန်ကြီးဌာန၊ ပုံနှိပ်ရေးနှင့် ထုတ်ဝေရေးဦးစီးဌာန၊ စာပေဗိမာန်ရုံးသည် အသက် (၁၂) နှစ် အောက်ကလေးများ ဖတ်ရှုနိုင်ရန် ရည်ရွယ်၍ ရွှေသွေးဂျာနယ်ကို အပတ်စဉ် စနေနေ့တိုင်း ထုတ်ဝေလျက်ရှိရာ ၂၀၁၉ ခုနှစ်၊ ဇူလိုင်လ ၂၀ ရက် (စနေနေ့) တွင် ထွက်ရှိမည့် ရွှေသွေးဂျာနယ် အတွဲ (၅၁) အမှတ် (၂၉) ၌ ကလေးများအနေဖြင့် သူတစ်ပါးပြောဆိုသော စကားကို ချင့်ချိန်၍ ယုံကြည်တတ်စေရန်နှင့် မိမိ၏ စီးပွားရေးလုပ်ငန်းများကို စာရင်းငှားများနှင့် လက်လွှဲမထားဘဲ မိမိကိုယ်တိုင် ဦးဆောင်ကာ ဆောင်ရွက်သင့်ပုံအကြောင်းကို တင်ဆက်ထားသည့် မျက်နှာဖုံးဇာတ်လမ်း၊ မိမိ၏လှပမှုနှင့် တစ်ပါးသူကို လှည့်ဖျားလိုသော စိတ်ကြောင့် အသက်ဆုံးရှုံးခဲ့ရသော မြေခွေးမ အကြောင်းကို ရေးဖွဲ့ထားသော နှစ်မျက်နှာဇာတ်လမ်း၊ ရှေ့တွင် ဖြစ်ပေါ်လာမည့် ဆိုးကျိုး၊ ကောင်းကျိုးတို့ကို မစဉ်းစားမဆင်ခြင်ဘဲ လတ်တလော အခြေအနေကိုသာ ကြည့်၍ ဆုတောင်းတတ်သည့် ‘ဆုတောင်းမေ’ နှစ်မျက်နှာဟာသဇာတ်လမ်းနှင့် အလွန်မေ့တတ်သော ကောင်းလေးတစ်ယောက်အကြောင်းကို ရေးဖွဲ့ထားသည့် ကာတွန်း မောင်ရွှေဝင်း ၏ “မေ့ … မေ့ … မေ့” တစ်မျက်နှာ ဟာသဇာတ်လမ်းတို့ ပါဝင်ပါသည်။

သုတကဏ္ဍတွင် ဝေလငါးများ၏ သဘာ၀အလျောက် ၀ဖြိုးနေပုံအကြောင်းနှင့် ၎င်းတို့၏ အဆီများ အသုံးဝင်ပုံအကြောင်းကို တင်ဆက်ထားပါသည်။ ပုံပြင်ကဏ္ဍတွင် မိဘများအနေဖြင့် သားသမီးများကို လွန်စွာအလိုမလိုက်သင့်ပုံနှင့် သားသမီးများကို သင့်လျော်သော အလုပ်များ ခိုင်းစေသင့်ပုံကို တင်ဆက်ထားပါသည်။ ထို့ပြင် အထူးကဏ္ဍအနေဖြင့် ဗီယမ်နမ်နိုင်ငံရှိ လေ့လာချင်စရာနေရာများ အကြောင်းကို တင်ဆက်ထားပါသည်။

အင်္ဂလိပ်ကဏ္ဍတွင် စားစရာအချို့၏ အမည်များကို ရုပ်ပုံနှင့်တကွ မြန်မာ-အင်္ဂလိပ် နှစ်ဘာသာဖြင့် တင်ဆက်ထားပြီး ရွှေသွေးစကားဝိုင်းကဏ္ဍတွင် ပြိုင်ပွဲတစ်ပွဲနှင့်ပတ်သက်၍ ပြောဆိုသုံးနှုန်းပုံအချို့ကို ‘conversation questions and answers’ ခေါင်းစဉ်ဖြင့် တင်ဆက်ထား ပါသည်။ ကလေးများ၏ အင်္ဂလိပ်စာအခြေခံကို ကောင်းမွန်စေသည့် အင်္ဂလိပ်သဒ္ဒါကဏ္ဍတွင် present perfect passive ကြိယာပုံသဏ္ဍာန်ရေးနည်းကို တင်ဆက်ထားပါရာ စနစ်တကျလေ့လာ မှတ်သားထားပါက ကလေးတို့၏ အင်္ဂလိပ်စာအရည်အသွေး တိုးတက်လာမည်မှာ အမှန်ပင် ဖြစ်ပါသည်။

ရွှေသွေးဂျာနယ်ကို ကိုယ်စားလှယ်အဖြစ် မှာယူဖြန့်ချိလိုပါက တစ်စောင်လျှင် ၂၅၀ ကျပ် နှုန်းဖြင့် စာပေဗိမာန်အရောင်းဌာနစု၊   အမှတ် (၅၂၉-၅၃၁)၊   ကုန်သည်လမ်း၊   ရန်ကုန်မြို့၊     ဖုန်း ၀၁-၃၈၁၄၄၈၊     ၀၁- ၂၄၉၀၃၁ သို့ ဆက်သွယ်မှာယူနိုင်ပါသည်။

Download PDF