ရွှေသွေးဂျာနယ်

၉ - ၁ - ၂၀၂၁ ရက်ထုတ် ရွှေသွေးဂျာနယ် အတွဲ (၅၃)၊ အမှတ် (၂) ထွက်ရှိ

တန်ဖိုး - ၃၀၀ကျပ်

ပြန်ကြားရေးဝန်ကြီးဌာန၊ ပုံနှိပ်ရေးနှင့်ထုတ်ဝေရေးဦးစီးဌာန၊ စာပေဗိမာန်ရုံးသည် အသက် (၁၂)နှစ် အောက် ကလေးငယ်များ ဖတ်ရှုနိုင်ရန် ရည်ရွယ်၍ ရွှေသွေးဂျာနယ်ကို အပတ်စဉ် စနေနေ့တိုင်း ထုတ်ဝေ လျက်ရှိရာ ၂၀၂၁ ခုနှစ်၊ ဇန်နဝါရီလ ၉ ရက် (စနေနေ့)တွင် ထွက်ရှိမည့် ရွှေသွေးဂျာနယ် အတွဲ(၅၃)၊ အမှတ် (၂)၌ လောဘ၊ ဒေါသ၊ မောဟကြီးခြင်းသည် အသက်ကိုပင် ရန်ရှာခံရတတ်ကြောင်းကို ကလေးတို့ သင်ခန်းစာယူနိုင်ရန် ရေးဖွဲ့တင်ပြထားသည့် “ပေါ်ဆန်းနှင့် လောဘ၊ ဒေါသ၊ မောဟ” မျက်နှာဖုံးကာတွန်း၊ ကလေးတို့ ငယ်စဉ်အခါ စကားသင်စအရွယ်၌ မှားတတ်သည့် စကားအသုံးအနှုန်းများကို သတိပြုမိစေရန် ချစ်စဖွယ် တင်ဆက်ထားသည့် “ဖိုးလုံး - ‘ယူ’ နှင့် ‘ချီ’ ” နှစ်မျက်နှာကာတွန်း၊ အသံကြောင့်ဖားသေဟူသည့် မြန်မာ စကားပုံကို ဟာသဖြစ်ဖွယ် ရေးဖွဲ့ထားသည့် “ဖိုးလပြည့်” တစ်မျက်နှာကာတွန်း၊ သူငယ်ချင်း၊ မိတ်ဆွေ အချင်းချင်း စည်းလုံးညီညွတ်စွာ နေထိုင်ကြရန်နှင့် မညီညွတ်ပါက အခြားသူ၏ တိုက်ခိုက်ခြင်းခံရပြီး အသက် အန္တရာယ်နှင့် ရင်ဆိုင်ရပုံကို ပညာပေးတင်ဆက်ထားသည့် “မညီညွတ်လို့” နှစ်မျက်နှာကာတွန်း၊ မိမိ၏ သူငယ်ချင်းများအပေါ် အနိုင်ယူကာ ဆက်ဆံသည့်အတွက် ဒုက္ခရောက်ရပုံကို သတိပြု ဆင်ခြင်ဖွယ် ဖော်ပြထားသည့် “ခွင့်လွတ်ပါ သူငယ်ချင်းတို့ရယ်” နှစ်မျက်နှာကာတွန်း၊ ဦးလေးဖြစ်သူအား အပန်းဖြေခရီးမထွက်ရန် လိမ္မာပါးနပ်စွာ ပြောဆိုတတ်သော ကျောက်ပုအကြောင်းကို ဟာသဖြစ်ဖွယ် တင်ဆက်ထားသည့် “ကျောက်ပု” မျက်နှာဝက်ကာတွန်းတို့ ကို တင်ဆက်ထားပါသည်။

သုတကဏ္ဍတွင် ကရင်တိုင်းရင်းသားတို့၏ နှစ်သစ်ကူးနေ့အကြောင်းကို ကလေးတို့ ဗဟုသုတရစေရန် တင်ဆက်ထားသည့် “ကရင်နှစ်သစ်ကူးနေ့” သုတဆောင်းပါး၊ ကလေးတို့ သင်္ချာဉာဏ်စွမ်းရည် ထက်မြက်စေရန် ဖော်ပြထားသည့် ဆရာမမြင့်စန္ဒာ၏ “ဝက်ဝံနဲ့ ပျားရည်အိုး” ဉာဏ်စမ်းသင်္ချာကဏ္ဍ တို့ကို တင်ဆက်ထားပါသည်။ ပုံပြင်ကဏ္ဍတွင် ရိုးသားဖြောင့်မှန်သူ၏ ရှက်ခြင်း၊ ကြောက်ခြင်းကြောင့် အန္တရာယ်မှလွတ်မြောက် ရပုံအကြောင်းကို ရေးသားတင်ဆက်ထားသည့် “ရှက်ခြင်း ကြောက်ခြင်း အန္တရာယ်ကင်း” ကလေးပုံပြင်၊ ကလေးတို့ ဆော့ကစားရာတွင် မိမိတစ်ဦးတစ်ယောက် ပျော်ရွှင်ရန်အတွက်သာ အဓိကမထားဘဲ အခြားတစ်ယောက်အား ထိခိုက်မှုမရှိစေရန် သတိပြု၍ ကစားရမည်ဖြစ်ကြောင်းကို သင်ခန်းစာပေး ဖော်ပြထားသည့် “ကလေးများနှင့် ဖားလေးများ” ပုံပြင်တို့ကို ဖတ်ရှုရမည်ဖြစ်ပါသည်။ ထို့ပြင် နိုင်ငံတော်က အားထားရသည့် လယ်သမားကြီးများ၏ ဆောင်းနံနက်ခင်းအချိန်တွင် နေထိုင်စားသောက်ကြပုံ တောရွာဓလေ့သဘာဝကို ထင်ဟပ်လာစေရန် ပုံဖော်ရေးဖွဲ့ထားသည့် “ဆောင်းနံနက်” ကဗျာကိုလည်း တင်ဆက်ထားပါသည်။ အင်္ဂလိပ်စာကဏ္ဍ အနေဖြင့် နေ့စဉ်သုံးအင်္ဂလိပ်စကားပြောနှင့်ပတ်သက်၍ သင်ခန်းစာသစ်အချို့ကို ရှင်းလင်း တင်ပြထားပြီး လေ့ကျင့်ခန်းသစ်များကို ကလေးတို့ လေ့လာမှတ်သားနိုင်မည်ဖြစ်ပါသည်။

ရွှေသွေးဂျာနယ်ကို ကိုယ်စားလှယ်အဖြစ် မှာယူဖြန့်ချိလိုပါက တစ်စောင်လျှင် ၃၀၀ ကျပ် နှုန်းဖြင့် စာပေဗိမာန်အရောင်းဌာနစု၊ အမှတ်(၅၂၉ - ၅၃၁)၊ ကုန်သည်လမ်း၊ ရန်ကုန်မြို့။  ဖုန်း - ၀၁- ၃၈၁၄၄၈၊ ၀၁-၂၄၉၀၃၁ သို့ ဆက်သွယ်မှာယူနိုင်ပါသည်။