ရွှေသွေးဂျာနယ်

(၂၈-၁၀-၂၀၁၇) ရက်ထုတ် ရွှေသွေးဂျာနယ် အတွဲ (၄၉)၊ အမှတ် (၄၃) ထွက်ရှိ

တန်ဖိုး - ၂၅၀ကျပ်

ပြန်ကြားရေး၀န်ကြီးဌာန၊ ပုံနှိပ်ရေးနှင့် ထုတ်ဝေရေးဦးစီးဌာန၊ စာပေဗိမာန်ရုံးသည် အသက် (၁၂) နှစ်အောက် ကလေးများ ဖတ်ရှုနိုင်ရန် ရည်ရွယ်၍ ရွှေသွေးဂျာနယ်ကို အပတ်စဉ် စနေနေ့တိုင်း ထုတ်ဝေလျက်ရှိရာ ၂၀၁၇ ခုနှစ်၊ အောက်တိုဘာလ ၂၈ ရက် (စနေနေ့) တွင် ထွက်ရှိမည့် ရွှေသွေး ဂျာနယ် အတွဲ (၄၉)၊ အမှတ် (၄၃)၌ အင်အားကြီးသည့်တိရစ္ဆာန်များက အားနည်းသည့် တိရစ္ဆာန် တို့အပေါ် အနိုင်ယူတတ်ပုံနှင့် အသံဝိဇ္ဇာမုဆိုး၏ အဖြစ်အပျက်ကို ဖတ်ရှုနိုင်ရန်  မျက်နှာဖုံး ဇာတ်လမ်းဖြင့် တင်ဆက်ထားပါသည်။ ထို့ပြင် ကလေးများ  ဖြတ်ထိုးဉာဏ်သုံးတတ်စေနိုင်ရန်နှင့် မိမိ၏ လုပ်ဆောင်ချက်ကို အကောင်းပြောတတ်သူတို့၏ သဘောသဘာ၀ကို သတိပြုမိတတ်စေရန် ဟာသနှော၍တင်ဆက်ထားသော နှစ်မျက်နှာဇာတ်လမ်းတို့လည်း ပါ၀င်ပါသည်။
မြန်မာစာစကားဝိုင်းကဏ္ဍတွင် ''အသံထွက်လွဲတတ် ကသတ်နဲ့ စသတ်'' ဟူသော ခေါင်းစဉ်ဖြင့် ဝိုင်းဖွဲ့ပြောဆိုဟန် တင်ဆက်ထားပြီး ကလေးပုံပြင်ကဏ္ဍ တွင် သူတစ်ပါးကို မကောင်းကြံပါက မိမိတွင်သာ ဘေးဒဏ်သင့်တတ်ပုံကို ဖော်ညွှန်းရေးဖွဲ့တင်ဆက်ထားပါသည်။ ထို့အပြင် ကလေးများ မျက်စိ လျင်လျင်ဖြင့် တူရာပစ္စည်းများကို ရှာဖွေနိုင်မည့် ''ဘယ်သူမျက်စိပိုလျင်လဲကဏ္ဍ'' နှင့် စက္ကူလေးများကို ခေါက်၍ အရုပ်ကလေးများ ဖန်တီးနိုင်မည့် ''စက္ကူခေါက်ကြရအောင်ကဏ္ဍ'' တို့ကိုလည်း ထည့်သွင်းတင်ဆက်ထားပါသည်။

အင်္ဂလိပ်စာကဏ္ဍတွင် ကလေးများ အင်္ဂလိပ်စာဝေါဟာရကြွယ်၀စေရန် ဓားအချို့၏ အမည်များကို အင်္ဂလိပ် - မြန်မာ နှစ်ဘာသာဖြင့် ဖော်ပြထားပါသည်။ ရွှေသွေးအင်္ဂလိပ်စကားဝိုင်း၌ 'Useful Expressions' ခေါင်းစဉ်ဖြင့် တစ်ခုခုအတွက် ကံကောင်းပါစေ၊ အောင်မြင်ပါစေ ဆုတောင်းနှင့် အကြောင်းအရာ တစ်ခုခုကို သဘောတူကြောင်း  ပြောဆိုပုံအသုံးအနှုန်းတို့ကို တင်ဆက်ထားပြီး ရွှေသွေးအင်္ဂလိပ်သဒ္ဒါကဏ္ဍတွင် 'To' ၏ အသုံးပြုပုံအမျိုးမျိုးကို တင်ဆက်ထားရာ ကလေးများ အင်္ဂလိပ်စာအရည်အသွေးတိုးတက်လာမည်မှာ အမှန်ပင်ဖြစ်ပါသည်။

ရွှေသွေးဂျာနယ်ကို ကိုယ်စားလှယ်အဖြစ် မှာယူဖြန့်ချိလိုပါက တစ်စောင်လျှင် ၂၅ဝိ/-ကျပ်နှုန်းဖြင့် စာပေဗိမာန် အရောင်းဌာနစု၊ အမှတ် (၅၂၉-၅၃၁)၊ ကုန်သည်လမ်း၊ရန်ကုန်မြို့၊ ဖုန်း-၀၁ ၃၈၁၄၄၈၊ ၂၄၉၀၃၁ သို့ ဆက်သွယ်မှာယူနိုင်ပါသည်။