ရွှေသွေးဂျာနယ်

ပြန်ကြားရေးဝန်ကြီးဌာန၊ ပုံနှိပ်ရေးနှင့် ထုတ်ဝေရေးဦးစီးဌာန၊ စာပေဗိမာန်ရုံးသည် အသက် (၁၂) နှစ်နှင့် အောက်ကလေးငယ်များ ဖတ်ရှုနိုင်ရန် ရည်ရွယ်၍ ရွှေသွေးဂျာနယ်ကို အပတ်စဉ် စနေနေ့တိုင်း ထုတ်ဝေလျက်ရှိရာ ၂၀၂၄ ခုနှစ်၊ ဒီဇင်ဘာလ ၂၈ ရက် (စနေနေ့)တွင် ထွက်ရှိမည့် ရွှေသွေးဂျာနယ် အတွဲ (၅၆)၊ အမှတ်(၅၂)၌ စည်သူတို့ သူငယ်ချင်းများ သိချင်သော သက်တံအကြောင်းကို အဘွားက ပြောပြ ထားပုံအား သရုပ်ဖော်ထားသည့် “ရောင်စုံတံတားလေး” မျက်နှာဖုံးကာတွန်း၊ လိပ်ပြာမယ်လေးရွှေရုပ်မှာ သူ၏ လှပသည့် အတောင်ပံများအပေါ် မာနကြီးပြီး ဘဝမြင့်မိသည့်အတွက် ဖမ်းဆီးခံရပုံအကြောင်း သရုပ်ဖော်ထားသည့် “မာနကြီးတဲ့ လိပ်ပြာမယ်” နှစ်မျက်နှာကာတွန်း၊ ကျောင်းဆရာဦးအောင်ကြီးက မိမိကြောက်ရသည်မှာ မိမိ၏ ကြောက်စိတ်ပင်ဖြစ်ကြောင်း တပည့်များကို ဆုံးမထားသည့် “ကြောက်စရာ” တစ်မျက်နှာကာတွန်း၊ အဝမလွန်ဘဲ အာဟာရဖြစ်အောင် နေထိုင်စားသောက်မှု မှန်ကန်စေရေး ဦးဦး ဖိုးရှုပ်က ကလေးများကို ဆုံးမထားသည့်အကြောင်း သရုပ်ဖော်ထားသည့် “ဖြိုးရဲ- အဝလွန်သူ” နှစ်မျက်နှာ ကာတွန်း၊ တပည့်မေသီဟန်က ဆရာဖြစ်သူကို သတိတရဖြင့် လာရောက်ကန်တော့သည့်အကြောင်း သရုပ်ဖော်ထားသည့် “ပီတိအပြုံး” နှစ်မျက်နှာကာတွန်းနှင့်   လင်းသစ်နှင့် သူ၏အဖေတို့ အပြန်အလှန် စကားနိုင်လုပြောထားသည့်အကြောင်း သရုပ်ဖော်ထားသည့် “လင်းသစ်” မျက်နှာဝက်ကာတွန်းတို့ကို တင်ဆက်ထားပါသည်။