ရွှေသွေးဂျာနယ်

ပြန်ကြားရေးဝန်ကြီးဌာန၊ ပုံနှိပ်ရေးနှင့် ထုတ်ဝေရေးဦးစီးဌာန၊ စာပေဗိမာန်ရုံးသည် အသက် (၁၂) နှစ်နှင့် ၁၂နှစ်အောက်ကလေးငယ်များ ဖတ်ရှုနိုင်ရန် ရည်ရွယ်၍ ရွှေသွေးဂျာနယ်ကို အပတ်စဉ် စနေနေ့တိုင်း ထုတ်ဝေလျက်ရှိရာ ၂၀၂၃ ခုနှစ်၊ သြဂုတ်လ ၂၆ ရက် (စနေနေ့)တွင် ထွက်ရှိမည့် ရွှေသွေးဂျာနယ် အတွဲ(၅၅)၊ အမှတ်(၃၄) ၌ ဘုရင်ကြီးအပေါ်ထားရှိသည့် စေတနာမှန်ကန်မှုကြောင့် ဘုရင်ကြီး၏ လေးလေးစားစား ဆက်ဆံခြင်းကို ခံရသော ဘုရင့်အကြံပေး ကြက်တူရွေးအကြောင်း ရေးဖွဲ့ထားသည့် “ပညာရှိ ကြက်တူရွေး” မျက်နှာဖုံးကာတွန်း၊ မိခင်တိုင်းက သူတို့၏ သားသမီးများအပေါ် အသက်နှင့်ထပ်တူ ချစ်ခင်ကြသည့်အကြောင်း သရုပ်ဖော်ထားသည့် “အသက်နှင့် ထပ်တူ” နှစ်မျက်နှာ ကာတွန်း၊ မူးယစ်ဆေးကို စမ်းသုံးကြည့်ရာက သူ့ဘဝပျက်စီးရသည်အထိ ဒုက္ခရောက်သွားခဲ့ရသော ကျောင်းသားလေး ပီယအကြောင်း ရေးဖွဲ့ထားသည့် “အမှားတစ်ချက်” နှစ်မျက်နှာကာတွန်း၊ ကြီးပွား ချမ်းသာရန်အတွက် နာမည်ကောင်းကို ရွေးချယ်ပေးတတ်ရုံဖြင့် မဖြစ်နိုင်ဘဲ မိမိကိုယ်တိုင်က ကံ၊ ဉာဏ်၊ ဝီရိယတို့အပေါ်တွင် အဓိကမူတည်နေကြောင်း ရေးဖွဲ့ထားသည့် “နာမည်” နှစ်မျက်နှာကာတွန်း၊ ကျောင်းစာတွင်သာမက ဗဟုသုတပါ ပြည့်စုံသည့် ရွှေယုအကြောင်း တင်ဆက်ထားသည့် “ရွှေယုပါဝင်တဲ့ စာဖတ်ပါ” တစ်မျက်နှာကာတွန်းနှင့် စောစောထသော တီကောင်သည် ငှက်၏အစာ ဖြစ်သွားရပုံ အကြောင်း ဟာသဖြစ်ဖွယ် သရုပ်ဖော်ထားသည့် “ဘယ်ကျော်” မျက်နှာဝက်ကာတွန်းတို့ကို တင်ဆက် ထားပါသည်။