ဆက်စပ် စာအုပ်များ
ရွှေသွေးဂျာနယ်
၅ - ၉ - ၂၀၂၆ ရက်ထုတ် ရွှေသွေးဂျာနယ် အတွဲ (၅၈)၊ အမှတ် (၃၆) ထွက်ရှိ
တန်ဖိုး - ၄၀၀ကျပ်
ပြန်ကြားရေးဝန်ကြီးဌာန၊ ပုံနှိပ်ရေးနှင့် ထုတ်ဝေရေးဦးစီးဌာန၊ စာပေဗိမာန်ရုံးသည် အသက် (၁၂) နှစ်နှင့် အောက်ကလေးငယ်များ ဖတ်ရှုနိုင်ရန် ရည်ရွယ်၍ ရွှေသွေးဂျာနယ်ကို အပတ်စဉ် စနေနေ့တိုင်း ထုတ်ဝေလျက်ရှိရာ ၂၀၂၆ ခုနှစ်၊ စက်တင်ဘာလ ၅ ရက် (စနေနေ့)တွင် ထွက်ရှိမည့် ရွှေသွေးဂျာနယ် အတွဲ (၅၈)၊ အမှတ်(၃၆)၌ အဆီအဆိမ့်များ စားသည့်အပြင် ကိုယ်လက်လှုပ်ရှားမှုပါ မရှိသဖြင့် ဖက်တီးပုတ်ဖြစ် နေသော ဖက်တီးအကြောင်းကို သရုပ်ဖော်ထားသည့် “လမ်းလျှောက်ကြမယ်” မျက်နှာဖုံးကာတွန်း၊ နေ့စဉ် သွားမှန်မှန်တိုက်ခြင်းဖြင့် သွားကျန်းမာရေးကို ဂရုစိုက်သင့်ကြောင်း သရုပ်ဖော်ထားသည့် “ဖြိုးရဲ - အရိုးမရှောင်တဲ့ သွား” နှစ်မျက်နှာကာတွန်း၊ သူတစ်ပါးကို ကူညီချင်လွန်းသော ကျောက်ပုအကြောင်းကို သရုပ်ဖော်ထားသည့် “ကျောက်ပုရဲ့ ကုသိုလ်” နှစ်မျက်နှာကာတွန်း၊ ကလေးထိန်းရင်း ကလေးနှင့် အပြိုင် ဆော့ကစားခဲ့သော မြဂျိုးအကြောင်းကို သရုပ်ဖော်ထားသည့် “မြဂျိုးနှင့် ကလေးထိန်းခြင်း” နှစ်မျက်နှာ ကာတွန်း၊ သူငယ်ချင်းများအပေါ် မသိမသာ လူလည်ကျလိုက်သည့် ပေါ်ဆန်းအကြောင်းကို သရုပ်ဖော် ထားသည့် “ပေါ်ဆန်း - အညီအမျှ” တစ်မျက်နှာကာတွန်းနှင့် သင်္ချာတွက်ရာတွင် အားလုံးမှားနေ၍ ပြန်တွက်ခဲ့ရသည့် ပေါက်စီတို့သားအဖအကြောင်းကို သရုပ်ဖော်ထားသည့် “ပေါက်စီရဲ့ ဖေဖေ တော်ချက်” မျက်နှာဝက်ကာတွန်းတို့ ပါဝင်ပါသည်။
စည်းလုံးညီညွတ်ခြင်း၊ ကိုယ်ခန္ဓာကြံ့ခိုင်ခြင်းနှင့် ပျော်ရွှင်ခြင်းတို့ကို ပေးစွမ်းသော ကစားနည်း တစ်ခုဖြစ်သည့် လွန်ဆွဲပွဲအကြောင်းကို ဗဟုသုတရဖွယ် ရေးသားထားသည့် “လွန်ဆွဲပွဲ” သုတဆောင်းပါး ကဏ္ဍ၊ မိခင်ဖခင်တို့၏ မေတ္တာ စေတနာကို နားလည်ကာ မိဘများက သင်ကြားပေးသော အတတ်ပညာ များကို ပျော်ရွှင်စွာ သင်ယူခဲ့သော ငန်းလေးအကြောင်းကို ရေးသားထားသည့် “ငန်းပေါက်လေးရဲ့ ပညာ ရေး” ပုံပြင်နှင့် အလုပ်တစ်ခုကို အကြိမ်ကြိမ် ပြုလုပ်ပါက အကျင့်တစ်ခုကဲ့သို့ ဖြစ်သွားနိုင်ပုံနှင့် မိမိတွင် မကောင်းသည့် အကျင့်ရှိပါကလည်း ကိုယ်တိုင်ပြုပြင်နိုင်မှသာ ထိုအကျင့်ဆိုးမှ လွတ်မြောက်နိုင်ကြောင်း ရေးသားထားသည့် “ကိုယ်တိုင် ပြုပြင်နိုင်မှ ချမ်းသာရ” ဝတ္ထုတို့ ပါဝင်ပါသည်။ ထို့ပြင် စာပေ၊ ဂီတ၊ သဘင်၊ ရုပ်ရှင် အစရှိသည်တို့နှင့် ပတ်သက်သည့် ယဉ်ကျေးမှု အမွေအနှစ်များရှိရာ စာဆိုဗိမာန်သို့ လာရောက်လေ့လာနိုင်ရန် ဖိတ်ခေါ်သည့် ကြော်ငြာ၊ တောတောင်ရေမြေတို့၏ သာယာပုံနှင့် ၎င်းတို့ကို ရေရှည်တည်တံ့အောင် ထိန်းသိမ်းကြရန် ရေးဖွဲ့ထားသည့် “တောတောင်ရေမြေ ထိန်းစို့လေ” ကဗျာနှင့် မူးယစ်ဆေး၏ ဆိုးကျိုးများနှင့် မူးယစ်ဆေးကို ဝေးဝေးမှ ရှောင်ကြဉ်ကြရန် သီကုံးရေးစပ်ထားသည့် “မူးယစ်ရင်ခွင် ရုန်းထွက်နှင်” ကဗျာတို့ ပါဝင်ပါသည်။
အင်္ဂလိပ်စာကဏ္ဍအနေဖြင့် ဘဏ်၌ ချက်လက်မှတ်ရေးပြီး ငွေသားထုတ်ယူရာ၌ ငွေသား ထုတ်မပေးဘဲ ငြင်းဆိုခြင်း ခံခဲ့ရသည်ကို အပြန်အလှန် ပြောဆိုဖြေရှင်းပုံအမျိုးမျိုးဖြင့် ဖော်ပြထားသည့် “ရွှေသွေးစကားဝိုင်း” ကို လေ့လာနိုင်မည် ဖြစ်ပါသည်။
ရွှေသွေးဂျာနယ်ကို ကိုယ်စားလှယ်အဖြစ် မှာယူဖြန့်ချိလိုပါက တစ်စောင်လျှင် ၄၀၀ ကျပ်နှုန်းဖြင့် စာပေဗိမာန်အရောင်းဌာနစု၊ အမှတ် (၅၂၉-၅၃၁)၊ ကုန်သည်လမ်း၊ ရန်ကုန်မြို့။ ဖုန်း- ၀၁-၃၈၁၄၄၈၊ ၀၁-၂၄၉၀၃၁ သို့ ဆက်သွယ်မှာယူနိုင်ပါသည်။
