ရွှေသွေးဂျာနယ်

ပြန်ကြားရေးဝန်ကြီးဌာန၊ ပုံနှိပ်ရေးနှင့် ထုတ်ဝေရေးဦးစီးဌာန၊ စာပေဗိမာန်ရုံးသည် အသက် (၁၂) နှစ်နှင့် အောက်ကလေးငယ်များ ဖတ်ရှုနိုင်ရန် ရည်ရွယ်၍ ရွှေသွေးဂျာနယ်ကို အပတ်စဉ် စနေနေ့တိုင်း ထုတ်ဝေလျက်ရှိရာ ၂၀၂၆ ခုနှစ်၊ ဩဂုတ်လ ၂၉ ရက် (စနေနေ့)တွင် ထွက်ရှိမည့် ရွှေသွေး ဂျာနယ် အတွဲ(၅၈)၊ အမှတ်(၃၅) တွင်  ခရီးသွားများ အရိပ်ရအောင် သစ်ပင်စိုက်၍ ကုသိုလ်ပြုသော ဗိုက်ပူအကြောင်းကို သရုပ်ဖော်ထားသည့် “သာဓုခေါ်စေသော်” မျက်နှာဖုံးကာတွန်း၊ ပျော်စရာနေရာကို ရှာဖွေရင်း နောက်ဆုံးတွင် နောင်တရကာ မိသားစုဆီသို့ ပြန်သွားသည့် ကြက်ဖကြီးအကြောင်းကို သရုပ်ဖော်ထားသည့်  “နောင်တ” နှစ်မျက်နှာကာတွန်း၊ သရက်သီး ခိုးခူးမိသည့် ညီပုနှင့် သူငယ်ချင်း နီကြောင်တို့သည် ပိုင်ရှင်သိသွားသောအခါ ပြေးခဲ့ရသည်ကို သရုပ်ဖော်ထားသည့် “ညီပု” တစ်မျက်နှာ ကာတွန်း၊ မမပန်ကြိုက်သည့် ဟင်းလျာများကို စေတနာနှင့် ဝယ်ပေးလိုက်မိသည့် မြဂျိုး၏ အမှားများ အကြောင်းကို သရုပ်ဖော်ထားသည့် “အလွဲလေးများ”  နှစ်မျက်နှာကာတွန်း၊ သူများအပေါ် အနိုင်ကျင့် တတ်သော ဝက်ဝံကြီးမောင်ဘိုကို ကူညီမည့်သူမရှိ၍ အသက်ဆုံးရှုံးခဲ့ရပုံကို သရုပ်ဖော်ထားသည့် “နိဂုံး” နှစ်မျက်နှာကာတွန်းနှင့် ကျောင်းကျန်းမာရေး ဆရာဝန်က မေးသည့် ပုပု၏ ချောင်းဆိုးရသည့် အကြောင်းရင်းကို ဟာသဖြစ်ဖွယ် သရုပ်ဖော်ထားသည့် “သုံးမျိုးအပြင်” မျက်နှာဝက်ကာတွန်းတို့ကို တင်ဆက်ထားပါသည်။

ကလေးတို့အနေနှင့် ရေဒါကိရိယာနှင့် ပတ်သက်၍ ဗဟုသုတရစေရန် ရေးသားထားသည့် “ရေဒါနည်းပညာ” သုတဆောင်းပါးကဏ္ဍ၊ စာပေ၊ ဂီတ၊ သဘင်၊ ရုပ်ရှင် စသည့် ယဉ်ကျေးမှု အမွေအနှစ် များကို အများပြည်သူများ ကြည့်ရှုလေ့လာနိုင်စေရန် ရည်ရွယ်၍ ဖွင့်လှစ်ပြသထားသည့် စာဆိုဗိမာန်သို့ လာရောက်လေ့လာနိုင်ရန် ဖိတ်ခေါ်ထားသည့် ကြော်ငြာကဏ္ဍ၊ ကားဆရာဦးမြမောင်သည် သူတစ်ပါး ပစ္စည်းကို ကောက်ရသော်လည်း ပိုင်ရှင်ထံ ပြန်လည်အပ်နှံလိုက်သည့်အတွက် ဝမ်းသာပီတိဖြစ်သွား သည့်အကြောင်းကို ရေးသားထားသည့် “သတင်းကောင်း တစ်ရပ်” ဝတ္ထုကဏ္ဍ၊ မင်းသားအယောင် ဆောင်ထားသည့် မင်းသမီးလေးအန်နာ၏ ကြင်ရာလောင်းရွေးပွဲအကြောင်းကို ရေးသားထားသည့် “မင်းသမီးလေး၏ ထူးဆန်းသော ကြင်ရာလောင်းရွေးပွဲ” ပုံပြင်ကဏ္ဍနှင့် မေမေက စောစောထကာ ထမင်းချက်ပုံ၊ ဖေဖေက လယ်ထဲဆင်းပုံ၊ ကိုကိုက စာထကျက်နေပုံ၊ မမလေးက ဆွမ်းတော်ကပ်ရန် ပြင်ဆင်ပုံနှင့် အငယ်ဆုံးသားလေးမို့ အားလုံးက ဝိုင်းချစ်ကြပုံအကြောင်းကို ရေးဖွဲ့ထားသည့် “အချစ်တော်” ကဗျာကဏ္ဍတို့ကို တင်ဆက်ထားပါသည်။ အင်္ဂလိပ်စကားပြောဆိုရာတွင် သဘာဝကျနစွာ ပြောဆိုလေ့လာနိုင်မည့် “အခြေခံ လိုအပ် သည့် အီဒီယမ်” ကဏ္ဍနှင့် ကဏ္ဍစုံလင်စွာ ထွက်ရှိပြီ ဖြစ်ပါသည်။