ရွှေသွေးဂျာနယ်

ပြန်ကြားရေးဝန်ကြီးဌာန၊ ပုံနှိပ်ရေးနှင့် ထုတ်ဝေရေးဦးစီးဌာန၊ စာပေဗိမာန်ရုံးသည် အသက် (၁၂) နှစ်အောက် ကလေးငယ်များ ဖတ်ရှုနိုင်ရန် ရည်ရွယ်၍ ရွှေသွေးဂျာနယ်ကို အပတ်စဉ် စနေနေ့ တိုင်း ထုတ်ဝေလျက်ရှိရာ ၂၀၂၆ ခုနှစ်၊ ဩဂုတ်လ ၂၂ ရက် (စနေနေ့)တွင် ထွက်ရှိမည့် ရွှေသွေးဂျာနယ် အတွဲ (၅၈)၊ အမှတ် (၃၄)၌ သူတစ်ပါးကို ကူညီတတ်သူနှင့် မကူညီတတ်သူတို့၏ ရလဒ်မတူညီပုံကို သရက်ပင်၊ ညောင်ပင်နှင့် ပျားဘုရင်မတို့ကို ဇာတ်ကောင်ထား၍ သရုပ်ဖော်ထား သည့် “စိတ်ထားကောင်းသော သရက်ပင်” မျက်နှာဖုံးကာတွန်း၊ ဉာဏ်ပညာရှိမှုကို စမ်းသပ်လိုသော ဘုရင်ကြီးနှင့် ဉာဏ်ပညာရှိစွာ တုံ့ပြန်လိုက်သော ပညာရှိအမတ်ကြီးတို့အကြောင်း သရုပ်ဖော်ထား သည့် “ပညာရှိ အမတ်” နှစ်မျက်နှာကာတွန်း၊ အလုပ်ကို ရွှေ့ဆိုင်းတတ်သည့် မြေးဖြစ်သူကို အဘိုးက အသိပညာ‌ပေး သွန်သင်ထားပုံကို သရုပ်ဖော်ထားသည့် “အဘိုးနှင့် မြေး” နှစ်မျက်နှာကာတွန်း၊ သူငယ်ချင်းများ၏ မိဘများအပေါ် သိတတ်မှုနားလည်မှုကို ကြည့်ကာ မိမိကိုယ်မိမိ နောင်တရမိသော မြဂျိုးအကြောင်း သရုပ်ဖော်ထားသည့် “မြဂျိုး” နှစ်မျက်နှာကာတွန်း၊ ကျောင်းမုန့်ဖိုးအတွက် တစ်ထောင်တန်ယူရမည်ကို ငါးထောင်တန်ဖြင့် မှားပြီး ယူသွားမိသည်ဆိုသော ဟန်သီမအကြောင်း သရုပ်ဖော်ထားသည့် “ဟန်သီမ” တစ်မျက်နှာကာတွန်းနှင့် ပိုက်ဆံပါပြီးသား စုဘူးကိုမှ ရချင် ကြောင်း သရုပ်ဖော်ထားသည့် “ဘယ်ကျော်” မျက်နှာဝက်ဟာသကာတွန်းတို့ကို တင်ဆက်ထားပါသည်။ 

သုတကဏ္ဍအနေဖြင့် ခေတ်အဆက်ဆက် တိုးတက်ပြောင်းလဲလာသော အသံဖမ်းစက်များအကြောင်း ဗဟုသုတဖြစ်ဖွယ် ရေးသားထားပါသည်။ ပုံပြင်ကဏ္ဍတွင် အမှိုက်များကို စနစ်တကျ မစွန့်ပစ်ခြင်းကြောင့် သဘာဝပတ်ဝန်းကျင်နှင့် တိရစ္ဆာန်လေးများ ဒုက္ခရောက်ကြရပုံကို ရေးသားထားပါသည်။ ဝတ္ထုကဏ္ဍအနေဖြင့် စပါးရိတ်သိမ်းချိန် ကောက်သင်း ကောက်သွားခဲ့ကြသည့် အိအိကျော်နှင့် မိခင်ဖြစ်သူတို့၏ အတွေ့အကြုံအကြောင်း ရေးသားထားပါသည်။ ထို့ပြင် ကျောင်းမှန်မှန်တက်ကာ ပညာထူးချွန်အောင် ကြိုးစားကြရမည်ဖြစ်ကြောင်း ရေးစပ်ထားသည့် ဆရာ မင်းနီခိုင် (မောင်တော)၏ “ဘဝဂုဏ်ရည်” ကဗျာကဏ္ဍကိုလည်း တင်ဆက်ထားပါသည်။ အင်္ဂလိပ်စာကဏ္ဍတွင် တစ်ဦးက အဝတ်လျှော်သည့်အခါ အခြားတစ်ဦးက သူ့အဝတ်များကို အဝတ်လျှော်စက်နှင့် ပေါင်းလျှော်ပေး၍ ရမရ အပြန်အလှန်ပြောဆိုပုံကို ကလေးတို့ လေ့လာ မှတ်သားနိုင်မည် ဖြစ်ပါသည်။