ရွှေသွေးဂျာနယ်

ပြန်ကြားရေးဝန်ကြီးဌာန၊ ပုံနှိပ်ရေးနှင့် ထုတ်ဝေရေးဦးစီးဌာန၊ စာပေဗိမာန်ရုံးသည် အသက် (၁၂) နှစ်နှင့် အောက်ကလေးငယ်များ ဖတ်ရှုနိုင်ရန် ရည်ရွယ်၍ ရွှေသွေးဂျာနယ်ကို အပတ်စဉ် စနေနေ့တိုင်း ထုတ်ဝေလျက်ရှိရာ ၂၀၂၆ ခုနှစ်၊ ဇွန်လ ၁၃ ရက် (စနေနေ့)တွင် ထွက်ရှိမည့် ရွှေသွေးဂျာနယ် အတွဲ (၅၈)၊ အမှတ် (၂၄) ၌ စကားကို ဖြောင့်မတ်မှန်ကန်စွာ ပြောဆိုမှုကြောင့် ဘုရင်ကြီး၏ မြှောက်စားချီးမြှင့်ခြင်းကို ခံခဲ့ရသည့် အမတ်ကြီးအကြောင်းကို သရုပ်ဖော်ထားသည့် “ပညာရှိ အမတ်ကြီး” မျက်နှာဖုံးကာတွန်း၊ သူတစ်ပါးကို ကူညီလုပ်ဆောင်ပေးတတ်သော ပရဟိတစိတ်ရှိမှုကြောင့် မိမိကြုံတွေ့နေရသော ဒုက္ခကို အချိန်မီ ဖြေရှင်းနိုင်ခဲ့ပုံအကြောင်း သရုပ်ဖော်ထားသည့် “ပရဟိတစိတ်၏ အကျိုးပေးပုံ” နှစ်မျက်နှာ ကာတွန်း၊ သဘောသဘာဝမတူညီသော တိရစ္ဆာန်များ ပေါင်းဖွဲ့နေထိုင်ရာတွင် ဆင်ခြင်တုံတရားရှိသင့်ပုံကို သရုပ်ဖော်ထားသည့် “ဇီးကွက်နှင့် မြည်း” နှစ်မျက်နှာကာတွန်း၊ သူတစ်ပါးပြောဆိုသည်ကို ပြီးဆုံးသည် အထိ နားမထောင်ဘဲ မိမိထင်မြင်ယူဆသည့်အတိုင်း လုပ်ဆောင်ခဲ့၍ ခွေးလိုက်ခံခဲ့ရသည့် ကျောက်ပု အကြောင်းကို သရုပ်ဖော်ထားသည့် “ကျောက်ပုရဲ့ စိန်ခေါ်ပွဲ” နှစ်မျက်နှာကာတွန်း၊  မိမိထီပေါက်သည့် ငွေနှင့် လောက်ငအောင် မသုံးတတ်၍ အကြွေးတင်ခဲ့ရသော မငွေခင်အကြောင်းကို သရုပ်ဖော်ထားသည့်  “အဆင်မခြင် မငွေခင်” တစ်မျက်နှာကာတွန်းနှင့်  အပျင်းပြေ ကြောင်ကို ရေချိုးပေးရာမှ ကြောင်နေမကောင်း၍ ပြုစုပေးနေရသည့် ဘိုမအကြောင်းကို သရုပ်ဖော်ထားသည့် “ဖိုးကောင်း - ကြောင်ရေချိုး” မျက်နှာဝက်ကာတွန်းတို့ ပါဝင်ပါသည်။

သုတဆောင်းပါးကဏ္ဍတွင် ထန်းပင်၊ အုန်းပင်များကဲ့သို့သော အပင်မြင့်တို့၏ အပင်အဖျား အလွန် ခိုင်ခံ့ သေသပ်လှပသည့် အသိုက်များကို ဆောက်လုပ်လေ့ရှိသော စာဘူးတောင်းငှက်များ၏ ဇွဲ၊ လုံ့လရှိပုံ အကြောင်းကို အတုယူရဖွယ် ရေးသားထားသည့် “အတုယူဖွယ် စာဘူးတောင်းငှက်ငယ်” သုတဆောင်းပါး၊ ဖခင်နှင့် လယ်တောသို့ လိုက်သွားရာမှ ကြာပန်းများ မြင်တွေ့ခဲ့ရပုံနှင့် ကြာရွက်ထီးလေး ဆောင်းခဲ့ရပုံကို သူငယ်ချင်းများအား ပြန်လည်ပြောပြမည့် မောင်ရဲသစ်အကြောင်းကို ရေးသားထားသည့် “လယ်တော အပြန် လက်ဆောင်” ဝတ္ထု၊ လူ့အသက်ပေါင်းများစွာအတွက် မိမိအသက်ကို စွန့်ကာ ကျားဆိုးကြီးကို နှိမ်နင်းပေးခဲ့သော မောင်ငယ်အကြောင်း ရေးသားထားသည့် “ရဲဝံ့စွန့်စားသူအတွက် ဆုလာဘ်” ပုံပြင်တို့ ပါဝင်ပါသည်။ ထို့ပြင် ကလေးတို့ ပေးပို့သော ပန်းချီလက်ရာများကို ဖော်ပြထားသည့် “ရွှေသွေးတို့ လက်ရာ” ကဏ္ဍ၊ ပေးထားသော ရုပ်ပုံကို ကလေးတို့ စိတ်ကြိုက်အရောင်များဖြင့် ခြယ်သနိုင်မည့် “ဆေးရောင်လှလှ ခြယ်ကြရအောင်” ကဏ္ဍနှင့် အနာဂတ်လူငယ်များ ဖြစ်လာမည့် ကလေးငယ်များ အနေဖြင့် မူးယစ်ကင်းစင်ကာ အကျင့်စာရိတ္တကောင်းမွန်သူများ ဖြစ်စေရန် သီကုံးရေးစပ်ထားသည့် “ပြုံးရွှင်လှပ အနာဂတ်ဘဝ” ကဗျာတို့ ပါဝင်ပါသည်။ အင်္ဂလိပ်စာကဏ္ဍအနေဖြင့် အင်တာနက်ချိတ်ဆက်မှု ပြတ်တောက်သွား၍ သက်ဆိုင်ရာသို့ အကြောင်းကြားကာ လာရောက်ပြင်ဆင်ပေးရန် အပြန်အလှန်ပြောဆိုကြပုံကို ရေးသားထားသည့် “ရွှေသွေးစကားဝိုင်း” များကို လေ့လာမှတ်သားနိုင်မည် ဖြစ်ပါသည်။

ရွှေသွေးဂျာနယ်ကို ကိုယ်စားလှယ်အဖြစ် မှာယူဖြန့်ချိလိုပါက တစ်စောင်လျှင် ၄၀၀ ကျပ်နှုန်းဖြင့် စာပေဗိမာန်အရောင်းဌာနစု၊ အမှတ် (၅၂၉-၅၃၁)၊ ကုန်သည်လမ်း၊ ရန်ကုန်မြို့။ ဖုန်း- ၀၁-၃၈၁၄၄၈၊     ၀၁-၂၄၉၀၃၁ သို့ ဆက်သွယ်မှာယူနိုင်ပါသည်။