စာအုပ်အမည် - ''အကြမ်းဖက်ဝါဒ၊ လုံခြုံရေးနှင့် လူ့အခွင့်အရေး''

စာရေးဆရာအမည် - ဇာနည် (ဘူမိဗေဒ)

တန်ဖိုး - ၁၂၀၀

စာညွှန်း -

''ဇာနည် (ဘူမိဗေဒ)'' ရေးသားသည့် ''အကြမ်းဖက်ဝါဒ၊ လုံခြုံရေးနှင့် လူ့အခွင့်အရေး''  စာအုပ်သစ်ကို စာပေဗိမာန်က ထုတ်ဝေ ဖြန့်ချိလိုက်ပြီ ဖြစ်ပါသည်။

အဆိုပါစာအုပ်သည် ၂ဝ၁၆ ခုနှစ်အတွက် စာပေဗိမာန်စာမူဆုပြိုင်ပွဲတွင် ဘာသာပြန်စာပေ ပထမဆုရ စာမူဖြစ်ပြီး စာပေဗိမာန်က ပြည်သူ့လက်စွဲစာစဉ် အဖြစ် ထုတ်ဝေဖြန့်ချိလိုက်ခြင်း ဖြစ်သည်။

''အကြမ်းဖက်ဝါဒ၊ လုံခြုံရေးနှင့် လူ့အခွင့်အရေး'' ဤစာမူတွင် ယနေ့ကမ္ဘာတွင် အကြမ်းဖက်မှုကို တရားဥပဒေစိုးမိုးမှုဖြင့်သာ တိုက်ဖျက်ရသည်ကို မီးမောင်းထိုးပြထားသည့် အိန္ဒိယနိုင်ငံ Viva Books Private Limited က ထုတ်ဝေပြီး Monshipouri ရေးသားသည့် ''Terrorism, Security and Human Rights (Hamessing the Rule of law)'' စာအုပ်မှ အခန်းနှစ်ခန်းဖြစ်သည့် Terrorism, Security and Human Right အခန်းနှင့် ''Military Intervention: Risks and Costs'' အခန်းတို့ကို ရွေးချယ်၍ စာပေဗိမာန်စာမူဆု ဘာသာပြန်စာမူအတွက် ပြဋ္ဌာန်းခဲ့ပါသည်။ ကမ္ဘာ့နိုင်ငံအချို့တွင် အကြမ်းဖက်ဝါဒကို တရားနည်းလမ်းကျစွာ ဖြေရှင်းနေရင်း အကြမ်းဖက် ဝါဒက ခေါင်းထောင်လာသည်။ အပြစ်မဲ့ပြည်သူများနှင့် နိုင်ငံ၏ အုပ်ချုပ်ရေးယန္တရားကို အမျိုးမျိုးဒုက္ခပေးနေသည်။ အကြမ်းဖက်မှုပေါ်ပေါက်လာပြီဆိုပါက တန်ပြန်ချေမှုန်းရာတွင် ပြည်သူတို့၏လုံခြုံရေးကို အဓိကထားရသည်။ စစ်ရေးအရ အရေးယူဆောက်ရွက်ရသည်။ ထိုအခါ ဒီမိုကရေစီမြှင့်တင်ရေး၊ တရားစီရင်ရေး၊ သံတမန်ရေးတို့မှာ ပူးတွဲပါလာစမြဲဖြစ်ပါသည်။ ယင်းဖြစ်ရပ်များကို အရှေ့အလယ်ပိုင်းနိုင်ငံများ၊ အာရှနိုင်ငံအချို့၏ ဖြစ်ရပ်များကို သာဓက ဆောင်ကာ တင်ပြထားသော လက်ရာဖြစ်ပါသည်။

ဘာသာပြန်ဆိုသူသည် မူရင်းစာရေးဆရာ၏ အာဘော်ကို မိအောင်ပြန်ဆိုနိုင်ကြောင်း တွေ့ရသည်။ ခိုင်မာစွာတည်ရှိသော ဝေါဟာရကို မူရင်းအဓိပ္ပာယ် အတိုင်း ဖော်ပြနိုင်သကဲ့သို့ အသစ်ထွင်ရသည့် စကားများမှာ လက်ခံနိုင်ဖွယ်ရာဖြစ်ပါသည်။ ဝေါဟာရများကို အသစ်ဖွင့်ဆိုရာတွင် အောက်ခြေ မှတ်စုများ ပေး၍ ယှဉ်တွဲဖော်ပြထားခြင်းဖြင့် Sincere Translation သဘော ပေါ်လွင်စေပါသည်။ အခန်းခေါင်းစဉ်အလိုက်ကိုလည်း ထိမိစွာ ပြန်ဆိုနိုင်သည်။ ဝါကျဖွဲ့စည်းမှု ကျစ်လျစ်၍ ပြေပြစ် ရှင်းလင်းသည်။ မူရင်းစာရေးဆရာ၏ အာဘော်ကို မြန်မာစာဖတ် ပရိသတ် ခံစားဖတ်ရှုနိုင်အောင် ဖော်ဆောင်နိုင် သော စာအုပ်ကောင်းတစ်အုပ် ဖြစ်ပါသည်။  

အဆိုပါစာအုပ်ကို အမှတ် ၅၂၉-၅၃၁၊ ကုန်သည်လမ်း၊ ရန်ကုန်မြို့ (ဖုန်း ဝ၁-၂၄၉၀၃၁၊ ဝ၁-၃၈၁၄၄၈) စာပေဗိမာန်စာအုပ်ဆိုင်မှ တန်ဖိုး ၁၂၀၀ ကျပ်ဖြင့် ဖြန့်ချိပြီး နေပြည်တော် သပြေကုန်း စျေးရှိ စာပေဗိမာန်စာအုပ်ဆိုင် (ဖုန်း ဝ၆၇-၄၁၄၆၈၁)၊ မန္တလေးမြို့  ၈၆ လမ်း (၂၁ လမ်းနှင့် ၂၂ လမ်းကြား) ရှိ စာပေဗိမာန်စာအုပ်ဆိုင် (ဖုန်း ဝ၂-၃၀၁၈၆) တို့နှင့် အမြို့မြို့ရှိ စာပေဗိမာန် ကိုယ်စားလှယ်ဆိုင်များတွင် ဝယ်ယူရရှိနိုင်ပါသည်။ လက်ကားမှာယူလိုပါက အမှတ် ၅၂၉-၅၃၁၊ ကုန်သည်လမ်း၊ ရန်ကုန်မြို့ (ဖုန်း ဝ၁-၂၄၉၀၃၁၊ ဝ၁-၃၈၁၄၄၈) စာပေဗိမာန် စာအုပ်ဆိုင်သို့ ဆက်သွယ်နိုင်ကြောင်း သိရသည်။