ဆက်စပ် စာအုပ်များ
ရွှေသွေးဂျာနယ်
၇- ၁၁ - ၂၀၂၆ ရ¬¬က်ထုတ် ရွှေသွေးဂျာနယ် အတွဲ (၅၈) အမှတ် (၄၅)ထွက်ရှိ
တန်ဖိုး - ၄၀၀ကျပ်
ပြန်ကြားရေးဝန်ကြီးဌာန၊ ပုံနှိပ်ရေးနှင့် ထုတ်ဝေရေးဦးစီးဌာန၊ စာပေဗိမာန်ရုံးသည် အသက် (၁၂) နှစ်နှင့် အောက်ကလေးငယ်များ ဖတ်ရှုနိုင်ရန် ရည်ရွယ်၍ ရွှေသွေးဂျာနယ်ကို အပတ်စဉ် စနေနေ့တိုင်း ထုတ်ဝေလျက်ရှိရာ ၂၀၂၆ ခုနှစ်၊ နိုဝင်ဘာလ ၇ ရက် (စနေနေ့)တွင် ထွက်ရှိမည့် ရွှေသွေးဂျာနယ် အတွဲ (၅၈)၊ အမှတ် (၄၅) ၌ သဘာဝကပေးသော မိမိ၏ဘဝနှင့် စွမ်းရည်ကို ကျေကျေနပ်နပ်လက်ခံကာ အန္တရာယ် ကြုံလာသောအခါတွင်လည်း လွတ်မြောက်အောင် ကြံဆောင်နိုင်ခဲ့သော လိပ်ကလေး အကြောင်းကို သရုပ်ဖော်ထားသည့် “စွမ်းရည်ကိုယ်စီ” မျက်နှာဖုံးကာတွန်း၊ သူတစ်ပါးခြံထဲမှ မာလကာသီးကို ပိုင်ရှင်မသိအောင် ဝင်ခူးနေ၍ မိမိ၏ဖိနပ်အသစ် ပျောက်ဆုံးသွားရသော ထူးထူး အကြောင်းကို သရုပ်ဖော်ထားသည့် “ထူးထူး- ခိုးစားမိလို့” နှစ်မျက်နှာကာတွန်း၊ တိရစ္ဆာန်ငယ်လေးများ အပေါ် အနိုင်ကျင့်ကာ စားသုံးတတ်သော ခြင်္သေ့ကြီး၏ အန္တရာယ်မှ ရှောင်ရှားနိုင်ခဲ့သော ယုန်ငယ်လေး၏ ဖြတ်ထိုးဉာဏ်ကောင်းပုံအကြောင်းကို သရုပ်ဖော်ထားသည့် “ဉာဏ်ကောင်းတဲ့ ယုန်ကလေး” နှစ်မျက်နှာ ကာတွန်း၊ သူငယ်ချင်းနှစ်ဦး၏ ခင်မင်မှုကို မပျက်စီးစေဘဲ မိမိ၏ စိုက်ပျိုးရေးခြံထဲသို့ ဝင်ရောက် ဖျက်ဆီးခဲ့သော ကြက်၊ ဘဲများအန္တရာယ်မှ ကာကွယ်နိုင်ခဲ့သော ဖိုးထူးအကြောင်းကို သရုပ်ဖော်ထားသည့် “အကြံကောင်း” နှစ်မျက်နှာကာတွန်း၊ ဈေးသည်၏ စကားကို သေချာစွာ မဆန်းစစ်ဘဲ ဈေးဝယ်ခဲ့မိ၍ နောင်တရသွားသော ပေါ်ဆန်းအကြောင်းကို သရုပ်ဖော်ထားသည့် “ပေါ်ဆန်း” တစ်မျက်နှာကာတွန်းနှင့် စာမကြိုးစားဘဲ စကားကိုသာ ကတ်တီးကတ်ဖဲ့ ပြောတတ်သော ဖိုးဇော်အကြောင်းကို သရုပ်ဖော်ထား သည့် “ရှေ့က ထည့်ထားတာ” မျက်နှာဝက်ကာတွန်းတို့ ပါဝင်ပါသည်။
သုတဆောင်းပါးကဏ္ဍ၌ လူမှုနယ်ပယ်တွင် တစ်ဦးနှင့် တစ်ဦး ပြောဆိုဆွေးနွေးမှုများ၊ ပူးပေါင်း ဆောင်ရွက်မှုများ ပြုလုပ်သင့်ကြောင်းကို ရေးသားထားသည့် “သင်နည်းအံဝင် “စီ” ငါးအင်” သုတ ဆောင်းပါး၊ တစ်သက်လုံး ဆိုးမိုက်ခဲ့သည်ကို နောင်တရ၍ အသက်သခင်ကျေးဇူးရှင်တို့ကို အသက်ပေး ကာ ကျေးဇူးဆပ်ခဲ့သော သူခိုးတစ်ယောက်အကြောင်းကို ရေးသားထားသည့် “အသက်ပေးပြီး ကျေးဇူး ဆပ်သူ” ပုံပြင်နှင့် မိခင် မုန့်ဟင်းခါးရောင်းသည်ကို ကူညီနေရသော်လည်း ကျောင်းစာတွင် လစ်ဟင်းမှု မရှိစေဘဲ ထူးချွန်အောင် ကြိုးစားနေသည့် ကျော်ဦးအကြောင်းကို ရေးသားထားသည့် “မုန့်ဟင်းခါးဆိုင်မှ အသိတစ်ခု” ဝတ္ထုတို့ ပါဝင်ပါသည်။ ထို့ပြင် ကလေးတို့ကိုယ်တိုင် ရေးဆွဲထားသည့် ပန်းချီလက်ရာများကို ဖော်ပြထားသည့် “ရွှေသွေးတို့ လက်ရာ” ကဏ္ဍ၊ စာပေ၊ ဂီတ၊ သဘင်၊ ရုပ်ရှင် စသည့် ယဉ်ကျေးမှု အမွေအနှစ်များကို အများပြည်သူများ ကြည့်ရှုလေ့လာနိုင်စေရန် ရည်ရွယ်၍ ဖွင့်လှစ်ပြသထားသည့် စာဆိုဗိမာန်သို့ လာရောက်လေ့လာနိုင်ရန် ဖိတ်ခေါ်ထားသည့် ကြော်ငြာနှင့် တစ်ဦးနှင့် တစ်ဦး ပေါင်းသင်း ဆက်ဆံရာ၌ တစ်ဦး၏ အခက်အခဲကို တစ်ဦးက ကူညီကာ ချစ်ချစ်ခင်ခင် ပြောဆိုဆက်ဆံသင့်ကြောင်း သီကုံးဖွဲ့ဆိုထားသည့် “အလှထုဆစ်စို့” ကဗျာနှင့် အသက်အရွယ်ကြီးလာပြီဖြစ်သော မိအိုဖအို ဘိုးဘွားအိုတို့ကို ဖေးမကူညီစောင့်ရှောက် ပေးရမည်ဖြစ်ကြောင်း သီကုံးစပ်ဆိုထားသည့် “အလှကုသိုလ်” ကဗျာတို့ ပါဝင်ပါသည်။
အင်္ဂလိပ်စာကဏ္ဍအနေဖြင့် အီဒီယမ်များအပါအဝင် Two-word Verb ဟု ခေါ်သော Phrasal Verb များ၏ အသုံးများနှင့် ပတ်သက်သည့် အင်္ဂလိပ်စာအသုံးအနှုန်းများကို လေ့လာနိုင်မည် ဖြစ်သည်။
ရွှေသွေးဂျာနယ်ကို ကိုယ်စားလှယ်အဖြစ် မှာယူဖြန့်ချိလိုပါက တစ်စောင်လျှင် ၄၀၀ ကျပ်နှုန်းဖြင့် စာပေဗိမာန်အရောင်းဌာနစု၊ အမှတ် (၅၂၉-၅၃၁)၊ ကုန်သည်လမ်း၊ ရန်ကုန်မြို့။ ဖုန်း- ၀၁-၃၈၁၄၄၈၊ ၀၁-၂၄၉၀၃၁ သို့ ဆက်သွယ်မှာယူနိုင်ပါသည်။
