ရွှေသွေးဂျာနယ်

ပြန်ကြားရေးဝန်ကြီးဌာန၊ ပုံနှိပ်ရေးနှင့် ထုတ်ဝေရေးဦးစီးဌာန၊ စာပေဗိမာန်ရုံးသည် အသက် (၁၂) နှစ်နှင့် အောက်ကလေးငယ်များ ဖတ်ရှုနိုင်ရန် ရည်ရွယ်၍ ရွှေသွေးဂျာနယ်ကို အပတ်စဉ် စနေနေ့တိုင်း ထုတ်ဝေလျက်ရှိရာ ၂၀၂၅ ခုနှစ်၊ နိုဝင်ဘာလ ၁၅ ရက် (စနေနေ့)တွင် ထွက်ရှိမည့် ရွှေသွေးဂျာနယ် အတွဲ (၅၇)၊ အမှတ်(၄၆)၌ သူတစ်ပါးပစ္စည်းကို ခိုးယူတတ်သော အကျင့်ရှိခြင်းကြောင့် သူငယ်ချင်းများ အကြားတွင် အရှက်ရခဲ့သော ချစ်ချစ်အကြောင်းကို သရုပ်ဖော်ထားသည့် “ပိုပိုမ ပါဝင်သော အကျင့်ဆိုး” မျက်နှာဖုံးကာတွန်း၊ စာဆိုတော်နေ့ ဖြစ်ပေါ်လာပုံအကြောင်းကို သရုပ်ဖော်ထားသည့် “ဂန္ထဝင် ခင်ခင်ပြူး နှင့် အပေါင်းအသင်းများ” နှစ်မျက်နှာကာတွန်း၊ ကစားမက်၍ ထိခိုက်ဒဏ်ရာရခဲ့သော အောင်ပုကို စိတ်ဓာတ်မကျစေရန် ဖခင်က မျက်စိမမြင်သော်လည်း နိုင်ငံကျော် ကာတွန်းရုပ်ပြဇာတ်လမ်းများ၌ အသံ သရုပ်ဆောင်အဖြစ် လုပ်ဆောင်နိုင်ခဲ့သူ ‘ကွမ်’ အကြောင်းကို ပြောပြပေးခဲ့ပုံကို သရုပ်ဖော်ထားသည့် “အောင်ပု” နှစ်မျက်နှာကာတွန်း၊ စဉ်းစားဆင်ခြင်တတ်သည့် အသိဉာဏ်ရှိပါက အသက်ဘေးမှပင် လွတ်မြောက်နိုင်ကြောင်းကို ကျားနှင့် ကျွဲတို့ကို ဥပမာပြု၍ သရုပ်ဖော်ထားသည့် “ဆင်ခြင်ဉာဏ်” နှစ်မျက်နှာကာတွန်း၊ ကလေးများကို သင်္ချာတွက်ချက်ရာ၌ အထောက်အကူဖြစ်စေရန် ဘုရားပန်းအရေ အတွက်ကို ဥပမာထား၍ တွက်ချက်နိုင်မည့် “ချက်ပု - ဉာဏ်နီ ဉာဏ်နက် အဖြေထွက်” တစ်မျက်နှာ ကာတွန်းနှင့် စာမေးပွဲနီးသော်လည်း စာမရသေး၍ မှတ်ဉာဏ်ကောင်းသည့် ဆေးကို ရှာဖွေနေသော ကျောင်းသား‌လေးအကြောင်းကို သရုပ်ဖော်ထားသည့် “ကျော်ကြီး” မျက်နှာဝက်ကာတွန်းတို့ကို တင်ဆက် ထားပါသည်။

သုတဆောင်းပါးကဏ္ဍတွင် အိပ်ရေးဝဝ အိပ်စက်ခြင်းကြောင့် ရရှိလာမည့် ကောင်းကျိုးများ အကြောင်းကို ရေးသားထားသည့် “အိပ်ရေးဝဝ အိပ်ကြမယ်” သုတဆောင်းပါး ပါဝင်ပြီး ရိုးသားစွာ လုပ်ကိုင်ခဲ့၍ သူဌေးသမီးလေးနှင့် လက်ဆက်ကာ မြေယာအိုးအိမ်များကို ပိုင်ဆိုင်ခွင့်ရသွားခဲ့သော လူငယ်လေးအကြောင်းကို ရေးသားထားသည့် “ရိုးသားသူနှင့် မရိုးသားသူ” ပုံပြင်နှင့် မိမိကို စာမေးလေ့ရှိသော ဆရာ၏ စေတနာကို နားလည်သွားခဲ့သော မောင်ဇော်မောင်အကြောင်းကို ရေးသား ထားသည့် “ဆရာ့စေတနာကို နားလည်ပါပြီ” ဝတ္ထုတို့ ပါဝင်ပါသည်။ ထို့ပြင် ကလေးတို့ကိုယ်တိုင် ရေးဆွဲ ထားသည့် ပန်းချီလက်ရာများကို ထည့်သွင်းဖော်ပြထားသည့် “ရွှေသွေးတို့လက်ရာ” ကဏ္ဍ၊ ကလေးတို့ အနေဖြင့် အင်္ဂလိပ်စာလုံးအချို့ကို အစစာလုံးနှင့် အဆုံးစာလုံးတို့ တူညီသည့် စကားလုံးအချို့ကို ရေးသားနိုင်မည့် “ဉာဏ်စမ်း” နှင့် နတ်တော်လထဲတွင် ကျရောက်သည့် စာဆိုတော်နေ့တွင် ကျင်းပသည့် စာပေဆုပေးပွဲအကြောင်းကို သီကုံးစပ်ဆိုထားသည့် “စာပေပွဲတော်နေ့” ကဗျာတို့ ပါဝင်ပါသည်။ အင်္ဂလိပ်စာကဏ္ဍအနေဖြင့် အိမ်သုံးပစ္စည်းတစ်ခုခု ပျက်စီးပါက ပြင်ဆင်ရန် ဆက်သွယ်ပြောဆိုရမည့် အကြောင်းအရာများကို အသုံးအနှုန်းအမျိုးမျိုးဖြင့် ရေးသားထားသည်ကို လေ့လာနိုင်မည် ဖြစ်ပါသည်။

ရွှေသွေးဂျာနယ်ကို ကိုယ်စားလှယ်အဖြစ် မှာယူဖြန့်ချိလိုပါက တစ်စောင်လျှင် ၄၀၀ ကျပ်နှုန်းဖြင့် စာပေဗိမာန်အရောင်းဌာနစု၊ အမှတ် (၅၂၉-၅၃၁)၊ ကုန်သည်လမ်း၊ ရန်ကုန်မြို့။ ဖုန်း- ၀၁-၃၈၁၄၄၈၊     ၀၁-၂၄၉၀၃၁ သို့ ဆက်သွယ်မှာယူနိုင်ပါသည်။