ရွှေသွေးဂျာနယ်

ပြန်ကြားရေးဝန်ကြီးဌာန၊ ပုံနှိပ်ရေးနှင့် ထုတ်ဝေရေးဦးစီးဌာန၊ စာပေဗိမာန်ရုံးသည် အသက် (၁၂) နှစ်အောက် ကလေးငယ်များ ဖတ်ရှုနိုင်ရန် ရည်ရွယ်၍ ရွှေသွေးဂျာနယ်ကို အပတ်စဉ် စနေနေ့ တိုင်း ထုတ်ဝေလျက်ရှိရာ ၂၀၂၆ ခုနှစ်၊ ဩဂုတ်လ ၁ ရက် (စနေနေ့)တွင် ထွက်ရှိမည့် ရွှေသွေးဂျာနယ် အတွဲ (၅၈)၊ အမှတ် (၃၁)၌ အလွန်ကပ်စေးနှဲသော သူဌေးကြီးသည် သားဖြစ်သူ၏ တရားပြမှုဖြင့် အမြင်မှန်ရသွားကာ နှမြောတွန့်တိုမှု မရှိတော့ဘဲ အလှူအတန်းများ ပေး၍ သီလဆောက်တည် နေထိုင်သွားပုံအကြောင်း သရုပ်ဖော်ထားသည့် “ကပ်စေးနှဲသူ” မျက်နှာဖုံးကာတွန်း၊ စာဖတ်ခြင်း၏ အကျိုးကြောင့် ဉာဏ်ပညာရှိလာပုံအကြောင်း သရုပ်ဖော်ထားသည့် “လုံးလုံးနှင့် ဖီနိုး ပါဝင်သည့် ဉာဏ်သုံးလို့” နှစ်မျက်နှာကာတွန်း၊ သူတစ်ပါးအပေါ် ကောက်ကျစ်စဉ်းလဲ၍ လိမ်ညာစားတတ်သော မြေခွေးအကြောင်း  သရုပ်ဖော်ထားသည့် “မြေခွေးနဲ့ ကျီးကန်း” နှစ်မျက်နှာကာတွန်း၊ ဖျားနေသူကို ကျွေးသည့် စားစရာများကို စားချင်သောကြောင့် ဉာဏ်ဆင်ခဲ့သည့် လင်းသုတအကြောင်း သရုပ်ဖော်ထားသည့် “လင်းသုတ” နှစ်မျက်နှာကာတွန်း၊ လပတ်စာမေးပွဲတွင် သင်္ချာ ဘဲဥရသည့် ဟန်သီမအကြောင်း သရုပ်ဖော်ထားသည့် “ဟန်သီမ” တစ်မျက်နှာဟာသကာတွန်းနှင့် ‘ဦးဦး တစ်ယောက်က ဘောလုံးကို ပြန်မပေးဘဲ ယူထားသည်’ ဆိုသော ဘယ်ကျော်အကြောင်း သရုပ်ဖော်ထားသည့် “ဘယ်ကျော်” မျက်နှာဝက်ဟာသကာတွန်းတို့ကို တင်ဆက်ထားပါသည်။

သုတကဏ္ဍအနေဖြင့် သရက်သီး မစားမီ သရက်သီး၏ အစေးကို စနစ်တကျ ဖယ်ရှားပြီးမှ စားသုံးသင့်ကြောင်း ရေးသားထားပါသည်။ ပုံပြင်ကဏ္ဍတွင် အချင်းချင်း လက်တွဲ ပူးပေါင်းဆောင်ရွက်ပါက ပိုမိုကောင်းမွန်သော ရလဒ်ကို ရရှိနိုင်ပုံအကြောင်း ဖတ်ရှုရမည်ဖြစ်ပါသည်။ ဝတ္ထုကဏ္ဍအနေဖြင့် ပုစဉ်းလေးများ၏ လူသားများအပေါ် အကျိုးပြုမှုကို သိရှိပြီး သူတို့အပေါ် သနားကရုဏာသက်မိသော ပေတိုးနှင့် သူငယ်ချင်းဖြစ်သူတို့အကြောင်း တင်ဆက်ထားပါသည်။ ထို့ပြင် ကလေးတို့ကိုယ်တိုင် ရေးဆွဲထားသည့် ပန်းချီလက်ရာများကို တင်ဆက်ထားသည့် ရွှေသွေးတို့ လက်ရာကဏ္ဍနှင့် ပန်းပေါင်းစုံတို့၏ ရနံ့ထက် ရင်သွေးငယ်၏ ပါးက ပိုမွှေးသည့်အကြောင်း ရေးစပ်ထားသည့် ဆရာမ ရွှေမြိုင်ပြုံးလဲ့မော်၏ “မေမေ့အဖြေ” ကဗျာကဏ္ဍတို့ကိုလည်း တင်ဆက်ထားပါသည်။ အင်္ဂလိပ်စာကဏ္ဍတွင် အီဒီယမ်များအပြင် Two-word Verb  ဟုခေါ်သော  Phrasal Verb များအကြောင်း ကလေးတို့ လေ့လာမှတ်သားနိုင်မည် ဖြစ်ပါသည်။