ရွှေသွေးဂျာနယ်

ပြန်ကြားရေးဝန်ကြီးဌာန၊ ပုံနှိပ်ရေးနှင့် ထုတ်ဝေရေးဦးစီးဌာန၊ စာပေဗိမာန်ရုံးသည် အသက် (၁၂) နှစ်အောက် ကလေးငယ်များ ဖတ်ရှုနိုင်ရန် ရည်ရွယ်၍ ရွှေသွေးဂျာနယ်ကို အပတ်စဉ် စနေနေ့ တိုင်း ထုတ်ဝေလျက်ရှိရာ ၂၀၂၆ ခုနှစ်၊ စက်တင်ဘာလ ၁၂ ရက် (စနေနေ့)တွင် ထွက်ရှိမည့် ရွှေသွေးဂျာနယ် အတွဲ (၅၈)၊ အမှတ် (၃၇)၌ သူငယ်ချင်းကို စိတ်ရင်းဖြင့် ကူညီတတ်သူ ပုပုနှင့် သွေးလွန်တုပ်ကွေးရောဂါ မဖြစ်အောင် ကြိုတင်ကာကွယ်နိုင်မည့် နည်းလမ်းကောင်းများအကြောင်း သရုပ်ဖော်ထားသည့် “ပုပုပါဝင်သည့် အတွင်းစိတ်” မျက်နှာဖုံးကာတွန်း၊ လေးခွပစ်ရာတွင် လက်တည့်ကြောင်း သူငယ်ချင်းများကို ပြချင်သော ပါဂျဲနှင့် သူ၏ သူငယ်ချင်းများအကြောင်း သရုပ်ဖော်ထားသည့် “ရာဇာ၊ ပါဂျဲ၊ ပုကွနှင့် စိမ်းလဲ့ ပါဝင်သော လက်တည့်လွန်းလို့” နှစ်မျက်နှာကာတွန်း၊ သူငယ်ချင်းဖြစ်သူ သာလှနှင့် ဖခင်တို့၏ တိုက်တွန်းမှုကြောင့် ပညာတတ် တစ်ဦးဖြစ်အောင် စာကို ကြိုးစားတော့မည်ဆိုသော အောင်ဘုအကြောင်း သရုပ်ဖော်ထားသည့် “ပညာတန်ဖိုး” နှစ်မျက်နှာကာတွန်း၊ လောဘကြီး၍ တစ်ကိုယ်ကောင်းစိတ်ထားရှိပါက ကောင်းကျိုး များ ပျောက်ကွယ်သွားတတ်ပုံကို သရုပ်ဖော်ထားသည့် “မှော်ရေကန်” နှစ်မျက်နှာ ကာတွန်း၊ အဘွားဖြစ်သူထံမှ ထဘီလေး တောင်းယူသည့် ဟန်သီမအကြောင်း သရုပ်ဖော်ထားသည့် “ဟန်သီမ” တစ်မျက်နှာ ဟာသကာတွန်းနှင့် ချောကလက်ကိတ်နှင့် နွားနို့ကို တစ်ဝက်စီ ဝေစားကြမည်ဆိုသော သူငယ်ချင်းနှစ်ဦးအကြောင်း သရုပ်ဖော်ထားသည့်  “ဘယ်ကျော်” မျက်နှာဝက် ဟာသကာတွန်းတို့ကို တင်ဆက်ထားပါသည်။

 

သုတကဏ္ဍအနေဖြင့် ခေတ်အဆက်ဆက် တိုးတက်လာသည့် အချိန်တိုင်းတာနည်းများ အကြောင်း ဗဟုသုတဖြစ်ဖွယ် ရေးသားထားပါသည်။ ပုံပြင်ကဏ္ဍတွင် ကျေးဇူးရှင်ကို ကျေးဇူးကန်းမိ  ရာက နူနာရောဂါဖြင့် ဘဝကို အဆုံးသတ်သွားရသော မုဆိုးတစ်ယောက်အကြောင်း ရေးသားထားပါသည်။ ဝတ္ထုကဏ္ဍအနေဖြင့် စာကြိုးစားမှုရှိရုံသာမက စည်းကမ်းလိုက်နာမှု၊ ရိုးသားမှု၊ တာဝန် သိတတ်မှု စသည်တို့ဖြင့် ပြည့်စုံသော ဆဋ္ဌမတန်းကျောင်းသူ မသန်းသန်းဝင်းအကြောင်း ဖတ်ရှုရမည် ဖြစ်ပါသည်။ ထို့ပြင် ‘ဆိုခဲစေ မြဲစေ’ ဆိုသည့် မြန်မာစကားပုံ၏ အသုံးပြုပုံကို ရှင်းလင်း တင်ပြထားသည့်  “ရွှေသွေးတို့အတွက် မြန်မာစကားပုံများ” ကဏ္ဍ၊ ငယ်ရွယ်စဉ် ပညာသင်ချိန်ကစ၍ ကြိုးကြိုးစားစားဖြင့် ပညာသင်ကြားပါက တစ်နေ့တွင် အောင်မြင်မှုရရှိမည်မှာ သေချာကြောင်း ရေးစပ်ထားသည့် ဆရာမ ရွှေမြိုင်ပြုံးလဲ့မော်၏ “သာသူ” ကဗျာကဏ္ဍတို့ကိုလည်း တင်ဆက်ထားပါသည်။ အင်္ဂလိပ်စာကဏ္ဍတွင် အီဒီယမ်များအပြင် Two-word Verb  ဟုခေါ်သော  Phrasal Verb များအကြောင်း ကလေးတို့ လေ့လာ မှတ်သားနိုင်မည် ဖြစ်ပါသည်။