စာပေဗိမာန်

နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်သည် ၂၀-၁၂-၂၀၁၈ ရက် နံနက် ၉ နာရီ တွင် နေပြည်တော်ရှိ မြန်မာအပြည်ပြည်ဆိုင်ရာ ကွန်ဗင်းရှင်းဗဟိုဌာန-၂ ၌ ကျင်းပသည့် စာတတ်သူတိုင်း စာဖတ်ရေး လှုပ်ရှားမှု အခမ်းအနားသို့ တက်ရောက်၍ အဖွင့်အမှာစကား ပြောကြားသည်။

အခမ်းအနားသို့ ပြည်သူ့လွှတ်တော် ဥက္ကဋ္ဌ ဦးတီခွန်မြတ်၊ အမျိုးသားလွှတ်တော် ဥက္ကဋ္ဌ မန်းဝင်းခိုင်သန်း၊ ပြည်သူ့လွှတ်တော် ဒုတိယဥက္ကဋ္ဌ ဦးထွန်းထွန်းဟိန်၊ အမျိုးသား လွှတ်တော် ဒုတိယဥက္ကဋ္ဌ ဦးအေးသာအောင်၊ ပြည်ထောင်စုဝန်ကြီး ဦးကျော်တင့်ဆွေ၊ ဒေါက်တာဖေမြင့်၊ သူရဦးအောင်ကို၊ ဒေါက်တာမျိုးသိမ်းကြီးနှင့် ဦးစိုးဝင်း၊ ဒုတိယဝန်ကြီး ဦးအောင်လှထွန်း၊ တိုင်းဒေသကြီးနှင့် ပြည်နယ်ဝန်ကြီးများ၊ လွှတ်တော်ကိုယ်စားလှယ်များ၊ ဌာနဆိုင်ရာအကြီးအကဲများ၊ စာပေပညာရှင်များ၊ စာရေးဆရာများ၊ စာတမ်းဖတ်ကြားသူများ၊ ဆုရစာကြည့်တိုက်မှူးများ၊ စာကြည့်တိုက် ဖောင်ဒေးရှင်း များနှင့် ပူးပေါင်းပါဝင်ကြသည့် အဖွဲ့အစည်းများမှ တာဝန်ရှိသူများ၊ စာပေကို စိတ်ပါဝင်စားကြသူများ၊ ဖိတ်ကြားထားသူများ တက်ရောက်ကြသည်။

အခမ်းအနားတွင် နိုင်ငံတော်၏အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်က အဖွင့်အမှာစကား ပြောကြားသည်။

ထို့နောက် နိုင်ငံတော်၏ အတိုင်ပင်ခံပုဂ္ဂိုလ်သည် အခမ်းအနားသို့ တက်ရောက် လာကြသူများနှင့်အတူ စုပေါင်း၍ မှတ်တမ်းတင်ဓာတ်ပုံရိုက်သည်။
ဆက်လက်၍ နိုင်ငံတော်၏ အတိုင်ပင်ခံပုဂ္ဂိုလ်သည် စာတတ်သူတိုင်းစာဖတ်ရေး လှုပ်ရှားမှု အထိမ်းအမှတ်ပြခန်းများကို စိတ်ပါဝင်စားစွာ လှည့်လည် ကြည့်ရှုအားပေးသည်။

ထို့နောက် နံနက် ၁၀ နာရီခွဲတွင် အခမ်းအနားကို ဆက်လက်ကျင်းပရာ ပြန်ကြားရေး ဝန်ကြီးဌာန ပြည်ထောင်စုဝန်ကြီးဒေါက်တာဖေမြင့်နှင့် ပညာရေး ဝန်ကြီးဌာန ပြည်ထောင်စုဝန်ကြီး ဒေါက်တာမျိုးသိမ်းကြီးတို့က နှုတ်ခွန်းဆက်စကား ပြောကြားကြသည်။

ထို့နောက် ပြည်ထောင်စုဝန်ကြီးဒေါက်တာဖေမြင့်က မြစ်ကြီးနားခရိုင်၊ ဘားအံခရိုင်၊ နတ်မောက်မြို့နယ် လူထုအခြေပြုဗဟိုဌာနများနှင့် ချောင်းဦးမြို့နယ်၊ ပုသိမ်ကြီးမြို့နယ် ပြည်သူ့စာကြည့်တိုက်များမှ ကိုယ်စားလှယ်များအားဆန်းသစ်တီထွင် စာကြည့်တိုက်ဆုများ ပေးအပ်ချီးမြှင့်သည်။

ယင်းနောက် ပြည်ထောင်စုဝန်ကြီး ဒေါက်တာမျိုးသိမ်းကြီးက ရန်ကုန်မြောက် ပိုင်းခရိုင်(အင်းစိန်) လူထုအခြေပြု ဗဟိုဌာနနှင့် မြောက်ဦးခရိုင်၊ စမ်းချောင်းမြို့နယ်၊ ညောင်ရွှေမြို့နယ် ပြည်သူ့စာကြည့်တိုက်များမှ ကိုယ်စားလှယ်များအား ဆန်းသစ်တီထွင် စာကြည့်တိုက်ဆုများ ပေးအပ်ချီးမြှင့်သည်။
ဆက်လက်၍ ဒုတိယဝန်ကြီး ဦးအောင်လှထွန်းက အမြင်သစ်စာကြည့်တိုက်၊ ထွန်းတောက် ရောင်ခြည်စာကြည့်တိုက်၊ ဓမ္မဇောတိ(e-library)၊ ရွှေညာမြေ စာကြည့်တိုက်၊ မြသိန်းတန် စာကြည့်တိုက်တို့မှ ကိုယ်စားလှယ်များအားလည်းကောင်း၊ နေပြည်တော်ကောင်စီဝင် ဦးအောင်မြင့်ထွန်းက ရန်ကုန်မြောက်ပိုင်းခရိုင် (အင်းစိန်) ဒေါ်ခင်ကြည်ဖောင်ဒေးရှင်း ရွေ့လျားစာကြည့်တိုက်၊ ကော့မှူးမြို့နယ် ဒေါ်ခင်ကြည် ဖောင်ဒေးရှင်း ရွေ့လျား စာကြည့်တိုက်၊ ပညာပါရမီစာကြည့်တိုက်၊ ကမ္ဘောဇလူငယ် စာကြည့်တိုက်၊ ထားဝယ် Millennium Centre တို့မှ ကိုယ်စားလှယ်များအားလည်းကောင်း ဆန်းသစ်တီထွင် စာကြည့်တိုက်ဆုများ ပေးအပ်ချီးမြှင့်သည်။

ထို့နောက် ဆုရရှိသူများကိုယ်စား စာကြည့်တိုက်မှူးတစ်ဦးက ကျေးဇူးတင်စကား ပြန်လည် ပြောကြားသည်။

ယင်းနောက် Ooredoo Myanmar ကုမ္ပဏီနှင့် Myanmar Book Aid and Preservation Foundation(MBAPF) တို့အကြား စာကြည့်တိုက်များ ရေရှည်တည်တံ့ရေးအတွက် ထောက်ပံ့ ကူညီမှုဆိုင်ရာ နားလည်မှုစာချွန်လွှာ လက်မှတ်ရေးထိုးပွဲကျင်းပရာ ပြည်ထောင်စုဝန်ကြီး ဒေါက်တာဖေမြင့်က ဝမ်းမြောက်စကား ပြောကြားသည်။

ထို့နောက် Myanmar Book Aid and Preservation Foundation မှ အမှုဆောင်ဒါရိုက်တာ ဒေါက်တာသန့်သော်ကောင်းက နားလည်မှုစာချွန်လွှာ ဆောင်ရွက်ခဲ့မှုနှင့် စပ်လျဉ်း၍လည်းကောင်း၊ Ooredoo Myanmar ကုမ္ပဏီမှ CEO Mr.VikramSinha က ကူညီထောက်ပံ့မှုဆိုင်ရာ များနှင့်စပ်လျဉ်း၍ လည်းကောင်း ရှင်းလင်းပြောကြားကြသည်။

ယင်းနောက် စာကြည့်တိုက်များ ရေရှည်တည်တံ့ရေးအတွက် ထောက်ပံ့ကူညီမှုဆိုင်ရာ နားလည်မှု စာချွန်လွှာကို ပြည်ထောင်စုဝန်ကြီး ဒေါက်တာဖေမြင့်နှင့် ဒုတိယဝန်ကြီး ဦးအောင်လှထွန်းတို့ ရှေ့မှောက်၌ ဒေါက်တာသန့်သော်ကောင်းနှင့် Mr.VikramSinha တို့က လက်မှတ်ရေးထိုး၍ အပြန်အလှန်လဲလှယ်ကြသည်။

ထို့နောက် Ooredoo Myanmar ကုမ္ပဏီမှ CEO Mr.VikramSinha က ပြန်ကြားရေးနှင့် ပြည်သူ့ဆက်ဆံရေး ဦးစီးဌာန ညွှန်ကြားရေးမှူးချုပ် ဦးရဲနိုင်ထံ စာတတ်သူတိုင်း စာဖတ်ရေး လှုပ်ရှားမှု အခမ်းအနားအတွက် အလှူငွေများပေးအပ်လှူဒါန်းသည်။

ထို့နောက် ဒေါက်တာသန့်သော်ကောင်းက ပြည်ထောင်စုဝန်ကြီး ဒေါက်တာဖေမြင့်နှင့် Mr.VikramSinha တို့ကို အမှတ်တရလက်ဆောင် ပေးအပ်သည်။
ထို့နောက်ဆွေးနွေးပွဲများဆက်လက်ကျင်းပရာ Community Library to Community Centre ခေါင်းစဉ်ဖြင့် ဒေါက်တာသန့်သော်ကောင်းကဦးဆောင်၍ ဒေါ်စန္ဒာချစ်ဖို့၊ ဒေါ်အေးသူဇာ၊ ဒေါ်ခင်နှင်းကြည်၊ ဦးအောင်သန်းထွဋ်နှင့် ဦးဇော်ထက်အောင်တို့ကလည်းကောင်း၊ စာတတ်သူတိုင်း စာဖတ်ရေးခေါင်းစဉ်ဖြင့် ဦးသန်းအုံး (မောင်ဇေယျာ) က ဦးဆောင်၍ ဒေါက်တာထွန်းအောင်ကျော်၊ ဒေါ်ဖြူနု(စပယ်ဖြူနု)၊ ဦးစိုးသူ(ဒီမိုစိုးသူ)နှင့် ဒေါ်မြဦးတို့က လည်းကောင်း၊ စာဖတ်သည့် အလေ့အထကောင်းများ ပူးပေါင်းဖော်ဆောင်ရေး ခေါင်းစဉ်ဖြင့် ဒေါ်အငယ်ထွေး(ယမင်းမြတ်အေး) က ဦးဆောင်၍ ဒေါ်နီလာဝင်း(ငွေကြယ်စင်)၊ ဦးထူးကျော်ဝင်း၊ ဦးမောင်မောင်ဦး (ဟိန်းလတ်) နှင့် ဦးမောင်မောင်စိုး တို့ကလည်းကောင်း ဆွေးနွေးကြသည်။

စာတတ်သူတိုင်းစာဖတ်ရေးလှုပ်ရှားမှုအခမ်းအနားဒုတိယနေ့ ဒီဇင်ဘာ ၂၁ ရက်တွင် အခြေခံပညာ ကဏ္ဍ၌ ကျောင်းစာကြည့်တိုက်များ ဖွံ့ဖြိုးရေးနှင့် စာဖတ်ရှိန် မြှင့်တင်ရေး ဆောင်ရွက်ချက်များ စာတမ်း၊ လူငယ်နှင့်စာကြည့်တိုက် ယဉ်ကျေးမှုစာတမ်း၊ ပြည်သူများ စာဖတ်ရှိန်မြှင့်တင်ရေး အတွက် ဆောင်ရွက်သင့်သည့် လုပ်ငန်းများစာတမ်း တို့ကိုဖတ်ကြားခြင်း၊ ကျောင်းစာကြည့်တိုက်များဖွံ့ဖြိုးရေးနှင့် စာဖတ်သည့် အလေ့အထများ ဖော်ဆောင်ရေး ခေါင်းစဉ်ဖြင့် ဆွေးနွေးပွဲ၊ စာတတ်သူတိုင်းစာဖတ်ရေးအတွက် တွေ့ကြုံနေရသည့် အခက်အခဲနှင့် ကျော်လွှားနိုင်မည့် နည်းလမ်းများဆွေးနွေးပွဲတို့ကို လည်းကောင်း ပြုလုပ်သွားမည်ဖြစ်ကြောင်း သိရှိရသည်။