ဆုရစာအုပ်များ
စာပေဆုရစာအုပ်များ
ပြည်ထောင်စုမြန်မာနိုင်ငံတော်အစိုးရ ပြန်ကြားရေးဝန်ကြီးဌာန
ပုံနှိပ်ရေးနှင့်စာအုပ်ထုတ်ဝေရေးလုပ်ငန်း စာပေဗိမာန်အဖွဲ့
စာပေဗိမာန်စာမူဆုများ ယှဉ်ပြိုင်ရန်စည်းကမ်းချက်များ
၁။ အကြောင်းအမျိူးမျိူးကြောင့် စက်တင်ပုံနှိပ်ခြင်းမပြုရသောစာပေနှင့်စာနယ်ဇင်းကလောင်ရှင်တို့၏ ပြောင်မြောက်သည့် စာမူများကို စာအုပ်အဖြစ်ထွက်ပေါ် လာစေရန်နှင့် ယင်းသို့ထွက်ပေါ်လာသောစာအုပ်တို့ကို အမျိူးသားစာပေဆုအတွက် စဉ်းစားနိုင်ရန် ရည်သန်၍ ပြန်ကြားရေးဝန်ကြီးဌာန စာပေဗိမာန်အဖွဲ့သည် အောက်ပါစာပေဆုရွေးချယ်ရေးဆိုင်ရာမူများနှင့်ကိုက်ညီသည့်စာမူများကို နှစ်စဉ်ပြိုင်ပွဲကျင်းပသော ဆုချီးမြှင့်၍ ဝယ်ယူပုံနှိပ်၊ ထုတ်ဝေမည် ဖြစ်ပါသည်။
၂။ စာပေဗိမာန်မှ စစ်ဆေးရွေးချယ်သော ချီးမြှင့်မည့်စာမူများမှာ
- (က) ဝတ္ထုရှည်ဆု
- (ခ) ဝတ္ထုတိုပေါင်းချုပ်ဆု
- (ဂ) ပြဇာတ်ပေါင်းချုပ်ဆု
- (ဃ) စာပဒေသာ(ဆောင်းပါး)ဆု
- (င) ဘာသာပြန်စာပေဆု
- (စ) ကလေးစာပေဆု
- (ဆ) လူငယ်စာပေဆု
- (ဇ) မြန်မာ့ယဉ်ကျေးမှုနှင့် အနုပညာဆိုင်ရာစာပေဆု
- (ဈ) နိုင်ငံရေးဆိုင်ရာစာပေဆု
- (ည) သုတပဒေသာဆု (ဝိဇ္ဇာပညာရပ်)
- (ဋ) သုတပဒေသာဆု (သိပ္ပံနှင့်အသုံးကျသိပ္ပံ ပညာရပ်)
- (ဌ) ကဗျာပေါင်းချုပ်ဆု
ပြိုင်ပွဲဝင်သူများ လိုက်နာရန်စည်းကမ်းများ
- (က) ကိုယ်တိုင် ပင်ကိုဉာဏ်ဖြင့် ပြုစု /ပြန်ဆိုရေးသားထားသောစာမူဖြစ်ရမည်။
- (ခ) မူပိုင်ကိစ္စ ရှင်းရှင်းလင်းလင်းရှိရမည်။
- (ဂ) ထိုစာမူကို ပြိုင်ပွဲသို့တင်သွင်းထားစဉ် စာအုပ် စာစောင်များတွင် ပုံနှိပ်ထုတ်ဝေရန် အစီအစဉ်မရှိစေရ။
- (ဃ) ဤစာမူကို စာပေဗိမာန်စာမူဆုအတွက် ယခင်က ယှဉ်ပြိုင်တင်သွင်းခြင်း မပြုဖူးသော စာမူဖြစ်ရမည်။
- (င) ဤစာမူကို စာအုပ်အဖြစ်လည်းကောင်း၊ မဂ္ဂဇင်းစာစောင်များတွင်လည်းကောင်း ပုံနှိပ်ဖော်ပြဖူးခြင်းမရှိစေရ။
- (စ) စာမူဆုပြိုင်ပွဲတွင် ပြန်ကြားရေးဝန်ကြီးဌာနမှ အမိန့်ကြော်ငြာစာဖြင့် ဖွဲ့စည်းထားသော စာပေလုပ်ငန်းဆိုင်ရာ အဖွဲ့ဝင်များနှင့်စာပေဗိမာန် စာတည်းဌာန ဝန်ထမ်းများ ပါဝင်ယှဉ်ပြိုင်ခွင့် မရှိပါ။
- (ဆ) ယခင် စာပေဗိမာန်စာမူဆုအတွက် ပြိုင်ပွဲဝင်၍ဆုမရသည့်စာမူများကို ပြင်ဆင်ချက်ဖြင့် ထပ်မံတင်သွင်းနိုင်ပါသည်။ ထိုသို့တင်သွင်းကြောင်း ဖော်ပြရပါမည်။
- (ဇ) ပြိုင်ပွဲဝင်စာမူသည် ပါဝင်ယှဉ်ပြိုင်သူတစ်ဦးတည်းပြုစုရေးသား ပြန်ဆိုသည့်စာမူဖြစ်ရမည်။
- (ဈ) အကိုးအကား ဖော်ပြချက်များနှင့် စပ်လျဉ်း၍မူပိုင်ကိစ္စ ရှင်းလင်းစေရမည်။
- (ည) ပြိုင်ပွဲဝင်သူတစ်ဦးသည် ဘာသာရပ်(၁၂)မျိူး ရှိသည့်အနက် ဘာသာရပ်တိုင်းတွင် ယှဉ်ပြိုင်ခွင့်ရှိသည်။
- (ဋ) စာမူများကို ဖူးစကတ်အရွယ်(သို့မဟုတ်)အခြားအရွယ်စက္ကူတစ်မျိူးတည်းတွင် မျက်နှာတစ်ဖက်တွင်သာ လက်နှိပ်စက်ရိုက်၍ဖြစ်စေ၊ ကွန်ပျူတာစာလုံးဖြင့်ဖြစ်စေ၊ ရှင်းလင်းပီသသောလက်ရေးဖြင့် ရေးသား၍ဖြစ်စေ ခိုင်ခံ့သေသပ်စွာ ချုပ်လုပ်ပြီးမိတ္တူနှစ်စောင် တင်သွင်းရမည်။
