ရွှေသွေးဂျာနယ်

ပြန်ကြားရေးဝန်ကြီးဌာန၊ ပုံနှိပ်ရေးနှင့် ထုတ်ဝေရေးဦးစီးဌာန၊ စာပေဗိမာန်ရုံးသည် အသက် (၁၂) နှစ်အောက်ကလေးများ ဖတ်ရှုနိုင်ရန် ရည်ရွယ်၍ ရွှေသွေးဂျာနယ်ကို အပတ်စဉ် စနေနေ့တိုင်း ထုတ်ဝေလျက်ရှိရာ ၂၀၂၀ ပြည့်နှစ်၊ မေလ ၉ ရက် (စနေနေ့) တွင် ထွက်ရှိမည့် ရွှေသွေးဂျာနယ် အတွဲ (၅၂)၊ အမှတ် (၁၉) ၌ လှူဒါန်းမှုအမျိုးအစားအလိုက် ရရှိနိုင်သော စေတနာအကျိုးကျေးဇူးများအကြောင်းကို တင်ဆက် ထားသည့် “လှူဒါန်းခြင်း အကျိုး’’ မျက်နှာဖုံးကာတွန်း၊ သစ်ပင်စိုက်ခြင်းသည် ဘဝနေထိုင်မှုတွင် ကြည်နူး ပျော်ရွှင်စေသော ပီတိကို ပေးစွမ်းပုံအကြောင်း ရေးဖွဲ့ထားသည့် “ဖိုးသန့်လေး” နှစ်မျက်နှာကာတွန်း၊ အမှိုက်များကို စနစ်တကျစွန့်ပစ်ပါက မလိုလားအပ်သော ဆိုးကျိုးများဖြစ်ခြင်းမှ ကာကွယ်ပေးနိုင်ပုံ အကြောင်းကို ရေးဖွဲ့ထားသည့် “စေတနာကံအကျိုး” နှစ်မျက်နှာကာတွန်း၊ တစ်ပါးသူနှင့် ယှဉ်ပြိုင်ရာတွင် ကောင်းသောဘက်မှသာ ယှဉ်ပြိုင်ရမည်ဖြစ်ကြောင်းကို သရုပ်ဖော်ထားသည့် “ဖူးငယ်နှင့် ပြူးကျယ်’’ တစ်မျက်နှာကာတွန်းနှင့် လက်ကို သန့်ရှင်းအောင် ဂရုတစိုက်ဆောင်ရွက်ပေးပါက ရောဂါအလွယ်တကူ မကူးစက်နိုင်ပုံအကြောင်းကို ရေးဖွဲ့ထားသည့် ‘‘အုပ်စိုးခန့်  Covid- 19 ကာကွယ်ရေး’’ တစ်မျက်နှာ ကာတွန်းတို့ကို တင်ဆက်ထားပါသည်။

သုတကဏ္ဍတွင် ကလေးတို့အတွက် ကျောင်းပညာရေးတွင် နည်းပညာစနစ်ကို ပေါင်းထည့် သင်ကြား ပေးခြင်းဖြင့် ရရှိနိုင်သော အကျိုးကျေးဇူးများအကြောင်းကို ဗဟုသုတဖြစ်ဖွယ် ဖတ်ရှုရမည် ဖြစ်ပါသည်။ ပုံပြင်ကဏ္ဍအနေဖြင့် လူတို့သည် နေရာကိုလိုက်၍ လောဘ၊ မောဟစိတ် ရှိတတ်ကြပြီး မတော်လောဘစိတ် ဖြစ်မိပါက ဘေးဒုက္ခနှင့် ရင်ဆိုင်ရမည်ဖြစ်ကြောင်းကို သတိပြုမိစေရန် တင်ဆက်ထားပါသည်။ ထို့ပြင် ကိုဗစ်-၁၉ ရောဂါကာကွယ်၊ ထိန်းချုပ်၊ ကုသရေး၌ အရှိန်အဟုန်မြှင့် ဆောင်ရွက်နိုင်ရန် ရည်ရွယ်၍ ကိုဗစ်-၁၉ Call Center များ ဖွင့်လှစ်ထားရှိပုံအကြောင်း ‘‘ကျန်းမာရေး အသိပေးချက်’’ ကဏ္ဍနှင့် ကိုရိုနာဗိုင်းရပ်စ် ကူးစက်မခံရစေရန် သတိပြုဆင်ခြင်ပြီး လိုက်နာကျင့်သုံးအပ်သော ကျန်းမာရေးပညာပေးချက်ကဏ္ဍတို့ကို တင်ဆက်ထားပါသည်။ အင်္ဂလိပ်စာကဏ္ဍတွင် V-ing အသုံးနှင့် ပတ်သက်၍ ဝါကျတည်ဆောက်ပုံ အမျိုးအစားများကို ကလေးတို့လေ့လာမှတ်သားနိုင်မည် ဖြစ်ပါသည်။

ရွှေသွေးဂျာနယ်ကို ကိုယ်စားလှယ်အဖြစ် မှာယူဖြန့်ချိလိုပါက တစ်စောင်လျှင် ၂၅၀ ကျပ်နှုန်းဖြင့် စာပေဗိမာန်အရောင်းဌာနစု၊   အမှတ် (၅၂၉-၅၃၁)၊   ကုန်သည်လမ်း၊   ရန်ကုန်မြို့၊   ဖုန်း ၀၁-၃၈၁၄၄၈၊  ၀၁- ၂၄၉၀၃၁ သို့ ဆက်သွယ်မှာယူနိုင်ပါသည်။