ရွှေသွေးဂျာနယ်

ပြန်ကြားရေးဝန်ကြီးဌာန၊ ပုံနှိပ်ရေးနှင့် ထုတ်ဝေရေးဦးစီးဌာန၊ စာပေဗိမာန်ရုံးသည် အသက် (၁၂) နှစ်အောက်ကလေးများ ဖတ်ရှုနိုင်ရန် ရည်ရွယ်၍ ရွှေသွေးဂျာနယ်ကို အပတ်စဉ် စနေနေ့တိုင်း ထုတ်ဝေ လျက်ရှိရာ ၂၀၂၀ ပြည့်နှစ်၊ မေလ ၂ ရက် (စနေနေ့) တွင် ထွက်ရှိမည့် ရွှေသွေးဂျာနယ် အတွဲ (၅၂)၊ အမှတ် (၁၈) ၌ ယွန်းယွန်းနှင့် အုပ်စိုးခန့်တို့ပါဝင်သည့် မြန်မာလူမျိုးတို့၏ ရိုးရာကဆုန်ညောင်ရေသွန်းပွဲတော် ကျင်းပရခြင်း သမိုင်းကြောင်းကို သရုပ်ဖော်ထားသည့် “ကဆုန်ညောင်ရေသွန်းပွဲတော်’’ မျက်နှာဖုံး ကာတွန်း၊ မီးဘေးအန္တရာယ် ကြိုတင်ကာကွယ် တားဆီးရာတွင် ပေါ့ဆမီးဖြစ်သော ဆေးလိပ်မီးကအစ သတိပြုဆင်ခြင်ရမည်ဖြစ်ကြောင်းကို ရေးဖွဲ့ထားသည့် “ညီပု” နှစ်မျက်နှာကာတွန်း၊ ပုပုတို့သူငယ်ချင်း တစ်စု၏ သူခိုးအား အမိဖမ်းပေးနိုင်ခဲ့ပုံအကြောင်းကို ရေးဖွဲ့ထားသည့်  ‘‘ပုပုပါဝင်သည့် စိန်ဘယက်’’ နှစ်မျက်နှာကာတွန်း၊ ကိုရိုနာဗိုင်းရပ်စ်ကပ်ဆိုးရောဂါ (COVID-19)  ကူးစက်မခံရစေရန်အတွက် လိုက်နာကျင့်သုံးရမည့် ကျန်းမာရေး ပညာပေးချက်အချို့ကို သရုပ်ဖော်ထားသည့် “ဝေးလေကောင်းလေ’’ တစ်မျက်နှာကာတွန်းနှင့် ခင်ခင်ပြူး၏ အဆင့်မြင့်စားသောက်ဆိုင် အကြောင်းကို ရေးဖွဲ့ထားသည့် ‘‘ဂန္ထဝင်ခင်ခင်ပြူးနှင့် အပေါင်းအသင်းများ’’ တစ်မျက်နှာ ကာတွန်းတို့ကို တင်ဆက်ထားပါသည်။

သုတကဏ္ဍတွင် ကမ္ဘာပေါ်ရှိ ထူးခြားသောငှက်အမျိုးအစားအချို့အကြောင်းကို ဗဟုသုတဖြစ်ဖွယ် ဖတ်ရှုရမည်ဖြစ်ပါသည်။ ဝတ္ထုကဏ္ဍအနေဖြင့် အထွန်းတို့သူငယ်ချင်းတစ်စု၏ ကြက်ပေါက်ကလေးများကို ဒုက္ခရောက်မိစေခဲ့ရာက နောင်တွင် မိမိ၏ပျော်ရွှင်မှုအတွက် သူတစ်ပါးအပေါ် ဒုက္ခမရောက်မိစေရန် သတိပြုနေထိုင်ရမည်ဖြစ်ကြောင်း တင်ဆက်ထားပါသည်။ ထို့ပြင် မိမိနိုင်ငံ၏ ဖွံ့ဖြိုးတိုးတက်ရေး လုပ်ငန်းများတွင် ပါဝင်ဆောင်ရွက်နိုင်ရန်အတွက် တန်ဖိုးမဖြတ်နိုင်သော ပညာကို ငယ်စဉ်ကတည်းက မပြတ်လေ့လာ သင်ယူရမည်ဖြစ်ကြောင်းကို သရုပ်ဖော်ပုံများဖြင့် ဝေဝေဆာဆာ တင်ဆက်ထားသည့် ကဗျာကို တင်ဆက်ထား ပါသည်။ အင်္ဂလိပ်စာကဏ္ဍတွင် မိမိအရပ်ဒေသရှိ ထင်ရှားသော အဆောက်အအုံတစ်ခုအကြောင်းနှင့် ပတ်သက်၍ အပြန်အလှန်မေးမြန်းပြောဆိုပုံ အင်္ဂလိပ်စာဝါကျ တည်ဆောက်ပုံအချို့ကို ကလေးတို့ လေ့လာမှတ်သားနိုင်မည် ဖြစ်ပါသည်။

ရွှေသွေးဂျာနယ်ကို ကိုယ်စားလှယ်အဖြစ် မှာယူဖြန့်ချိလိုပါက တစ်စောင်လျှင် ၂၅၀ ကျပ်နှုန်းဖြင့် စာပေဗိမာန်အရောင်းဌာနစု၊   အမှတ် (၅၂၉-၅၃၁)၊   ကုန်သည်လမ်း၊   ရန်ကုန်မြို့၊   ဖုန်း ၀၁-၃၈၁၄၄၈၊   ၀၁- ၂၄၉၀၃၁ သို့ ဆက်သွယ်မှာယူနိုင်ပါသည်။