ရွှေသွေးဂျာနယ်

ပြန်ကြားရေးဝန်ကြီးဌာန၊ ပုံနှိပ်ရေးနှင့် ထုတ်ဝေရေးဦးစီးဌာန၊ စာပေဗိမာန်ရုံးသည် အသက် (၁၂) နှစ်နှင့်အောက် ကလေးငယ်များ ဖတ်ရှုနိုင်ရန် ရည်ရွယ်၍ ရွှေသွေးဂျာနယ်ကို အပတ်စဉ် စနေနေ့တိုင်း ထုတ်ဝေလျက်ရှိရာ ၂၀၂၄ ခုနှစ်၊ အောက်တိုဘာလ ၁၂ ရက် (စနေနေ့)တွင် ထွက်ရှိမည့် ရွှေသွေးဂျာနယ် အတွဲ (၅၆)၊ အမှတ်(၄၁)၌ သီတင်းကျွတ်ကျောင်းပိတ်ရက်တွင် သူငယ်ချင်းများနှင့်အတူ ဆရာမိဘများကို ကန်တော့ကာ မီးထွန်းပွဲတော်ကို ပျော်ပျော်ရွှင်ရွှင်ဆင်နွှဲခဲ့ကြသည့် အောင်ဘုတို့ သူငယ်ချင်းများအကြောင်းကို ရေးဖွဲ့ထားသည့် “ပျော်ရွှင်ဆင်နွှဲ သီတင်းကျွတ်မီးထွန်းပွဲ” မျက်နှာဖုံး ကာတွန်း၊ တစ်အိမ်တည်းနေ ကြောင်အချင်းချင်း ရန်မဖြစ်ကြဘဲ သင့်သင့်မြတ်မြတ်နေထိုင်ကြမည်ဟု ကတိပေးထားသော်လည်း အစာကိုမြင်၍ အချင်းချင်း ရန်စောင်မိကြပုံအကြောင်းကို ရေးဖွဲ့ထားသည့် “ကတိသစ္စာ” နှစ်မျက်နှာကာတွန်း၊ စင်ရော်ငှက်နှင့် ဇီးကွက်တို့မှာ ကုန်ပစ္စည်းများ ကုန်သွယ်ကြရာမှ သင်္ဘောမှောက်ကာ ၎င်းတို့၏ နေထိုင်မှုပုံစံများ ပြောင်းလဲသွားရပုံအကြောင်းကို ရေးဖွဲ့ထားသည့် “စင်ရော်ငှက်နှင့် ဇီးကွက်” နှစ်မျက်နှာကာတွန်း၊ သားကောင်ကြီးရှိမည်အထင်နှင့် ကျောက်ဂူအဝကို မီးရှို့ရာမှ ကျောက်ဂူပေါက်ကွဲသွားမှုကြောင့် ကြောက်လန့်တကြားပြေးခဲ့ရသော ဖိုးချွန်းနှင့် ဝိတ်ပေါတို့ နှစ်ယောက်အကြောင်းကို ရေးဖွဲ့ထားသည့် “ဖိုးချွန်း၊ ဝိတ်ပေါနှင့် သူပြေးကိုယ်ပြေး” နှစ်မျက်နှာကာတွန်း၊ သီတင်းကျွတ်လပြည့်နေ့တွင် ဗြောက်ဖောက်ကာ ခြောက်လှန့်မိ၍ မိခင် ဆေးရုံရောက်ရသည်ကို နောင်တ ရသွားသည့် ဟိန်းစည်အကြောင်းကို သတိပြုဖွယ် ရေးဖွဲ့ထားသည့် “ပန်ပန်- သီတင်းကျွတ်ချိန်ခါ” တစ်မျက်နှာကာတွန်းနှင့် ဆရာမမေးသည့် မေးခွန်းများကို သွက်သွက်လက်လက်ဖြင့် ဖြေကြားခဲ့သည့် ဖြတ်ထိုးဉာဏ်ကောင်းသော ဖိုးဂျီအကြောင်းကို ရေးဖွဲ့ထားသည့် “ဖိုးဂျီ” မျက်နှာဝက်ကာတွန်းတို့ ပါဝင်ပါသည်။

အင်္ဂလိပ်စာ သင်ခန်းစာကဏ္ဍအနေဖြင့် အင်္ဂလိပ်စကားအသုံးအနှုန်းတွင် ထူးခြား အဓိပ္ပာယ်၊ သီးခြားအဓိပ္ပာယ်ထွက်သည့် စကားလုံးအချို့အကြောင်းကို ရေးဖွဲ့ထားသည့် “Useful Everyday Idioms” အင်္ဂလိပ်စာအသုံးအနှုန်းများကို လေ့လာမှတ်သားနိုင်မည် ဖြစ်ပါသည်။