ရွှေသွေးဂျာနယ်

ပြန်ကြားရေးဝန်ကြီးဌာန၊ ပုံနှိပ်ရေးနှင့် ထုတ်ဝေရေးဦးစီးဌာန၊ စာပေဗိမာန်ရုံးသည် အသက် (၁၂) နှစ်နှင့် အောက်ကလေးငယ်များ ဖတ်ရှုနိုင်ရန် ရည်ရွယ်၍ ရွှေသွေးဂျာနယ်ကို အပတ်စဉ် စနေနေ့တိုင်း ထုတ်ဝေလျက်ရှိရာ ၂၀၂၆ ခုနှစ်၊ အောက်တိုဘာလ ၁၇ ရက် (စနေနေ့)တွင် ထွက်ရှိမည့် ရွှေသွေးဂျာနယ် အတွဲ (၅၈)၊ အမှတ်(၄၂)၌ ကျောင်းပိတ်ရက်တွင် မဟာမြိုင်ဘေးမဲ့တော၌ ပန်းချီဆွဲနေရာမှ ဆိတ်လိုက်၍ ပြေးခဲ့ရသော ပလာတူးအကြောင်းကို သရုပ်ဖော်ထားသည့် “အပြေးဝိဇ္ဇာ” မျက်နှာဖုံးကာတွန်း၊ အပျင်းကြီးလွန်း၍ အိပ်မက်ထဲတွင် နတ်ဆိုးမည်းကြီး၏ ဆုံးမခြင်းကို ခံခဲ့ရသော ကျောက်ပုအကြောင်းကို သရုပ်ဖော်ထားသည့် “ရည်ရွယ်ချက်” နှစ်မျက်နှာကာတွန်း၊ အချင်းချင်း ဒေါသ၊ မောဟနှင့် ကြွားဝါမှုများ များပြားလာပါက ပျက်စီးမှုများသာ ကြုံတွေ့ရနိုင်ပုံကို သရုပ်ဖော်ထားသည့် “ပြိုင်ဆိုင်ခြင်း” နှစ်မျက်နှာကာတွန်း၊ ကျားနှင့် ဆင်တို့ သူငယ်ချင်းအချင်းချင်း တစ်ကောင်နှင့် တစ်ကောင် အထင်အမြင်လွဲကာ ရန်သူဖြစ်သွားကြပုံကို သရုပ်ဖော်ထားသည့် “အထင်မလွဲကြေး” နှစ်မျက်နှာကာတွန်း၊ စကားကို ကတ်တီးကတ်ဖဲ့ပြောတတ်သော သားသားအကြောင်းကို သရုပ်ဖော်ထားသည့် “ဖားကြောက်တဲ့ သားသား” တစ်မျက်နှာ ကာတွန်းနှင့် ရွှံ့များပေကျံသွားသောကြောင့် မိမိချော်လဲလာသည်ကို မိခင်သိရှိသွားရပုံကို သရုပ်ဖော်ထားသည့် “ပိုင်ပိုင်လေး ပါဝင်သော မိုးကြောင့်” မျက်နှာဝက်ကာတွန်းတို့ ပါဝင်ပါသည်။

ကလေးတို့၏ နေ့စဉ်လူနေမှုဘဝ သာယာလုံခြုံစေရန်အတွက် အကူအညီပေးနေသူများ အကြောင်းကို ဗဟုသုတရဖွယ် ရေးသားထားသည့် “ပတ်ဝန်းကျင်ကို အကူအညီပေးကြသူများ (Community Helpers)” သုတဆောင်းပါး၊ သူတစ်ပါးပစ္စည်းကို တွေ့ရှိပါက မိမိပစ္စည်းကဲ့သို့ မြတ်နိုး တန်ဖိုးထားကာ ပိုင်ရှင်ကို ပြန်လည်ပေးအပ်သင့်ကြောင်း ရေးသားထားသည့် “ကိုယ်ကျင့်တရား လက်ကိုင်ထား” ဝတ္ထုနှင့် မိမိ၏ ကြောင်ဘဝကို မကျေမနပ်ဖြစ်ကာ ဘဝအမျိုးမျိုးကို ကူးပြောင်းခဲ့သော်လည်း နောက်ဆုံးတွင် ကြောင်ဘဝဖြင့်သာ ကျေကျေနပ်နပ် အဆုံးသတ်ခဲ့ရသော ကြောင်လေးအကြောင်း ကို ရေးသားထားသည့် “ကြောင်ဖြစ်ချင်တဲ့ ဘဝ” ပုံပြင်တို့ ပါဝင်ပါသည်။ ထို့ပြင် စာပေ၊ ဂီတ၊ သဘင်၊ ရုပ်ရှင် အစရှိသည်တို့နှင့် ပတ်သက်သည့် ယဉ်ကျေးမှုအမွေအနှစ်များရှိရာ အစာဆိုဗိမာန်သို့ လာရောက် လေ့လာနိုင်ရန် ဖိတ်ခေါ်သည့်ကြော်ငြာ၊ လူကြီးမိဘတို့၏ ဆုံးမစကားကို နားမထောင်ဘဲ မျက်ကွယ်ပြုထားပါက ဘဝတွင် ဆုံးရှုံးပူလောင်မှုများနှင့် ကြုံတွေ့ရနိုင်ကြောင်း သီကုံးစပ်ဆိုထားသည့် “နောင်တမီး” ကဗျာ၊ လိမ္မာရေးခြားရှိစေရန်နှင့် ဝိဇ္ဇာ၊ သိပ္ပံစသည့်အတတ်ပညာများကို သင်ယူနိုင်စေရန် စာသင်ကျောင်းသို့ သွားရမည်ဖြစ်ကြောင်း သီကုံးစပ်ဆိုထားသည့် “ကျောင်းသွားရအောင်” ကဗျာနှင့် သီတင်းကျွတ်လ၏ ပတ်ဝန်းကျင်ရာသီဥတုအခြေအနေနှင့် ရာသီပွဲများအကြောင်းကို သီကုံးရေးစပ်ထားသည့် “သီတင်းကျွတ် လ ရာသီ” ကဗျာတို့ ပါဝင်ပါသည်။

အင်္ဂလိပ်စာကဏ္ဍအနေဖြင့် ဘဏ်၌ ချက်လက်မှတ်နှင့် ငွေသွင်းချင်သည့်အကြောင်းကို ဘဏ်သို့ လာရောက်သူနှင့် ဘဏ်ဝန်ထမ်းတို့ အပြန်အလှန်ပြောဆိုပုံအမျိုးမျိုးဖြင့် ရေးသားထားသည့် “ရွှေသွေး စကားဝိုင်း” အင်္ဂလိပ်စာကဏ္ဍတို့ ပါဝင်ပါသည်။