စာပေဗိမာန်

အမျိူးသားခေါင်းဆောင်ကြီး ဗိုလ်ချုပ်အောင်ဆန်း၏ လမ်းညွှန်မှုဖြင့် ဦးနုနှင့် စာပေပညာရှင်များ ဦးဆောင်၍ မြန်မာနိုင်ငံဘာသာပြန်စာပေအသင်းကြီး Burma Translation Society ကို ၁၉၄၇ ခုနှစ်၊ သြဂုတ်လ ၂၆ ရက်တွင် စတင်ဖွဲ့စည်းခဲ့သည်။ ၁၉၄၈ ခုနှစ်၊ မေလတွင် အသင်းကြီးကို ပြည်လမ်းရှိ အမှတ် (၃၆၁) ဆိုရန်တိုဗီလာအဆောက်အအုံသို့ ပြောင်းရွှေ့ဖွင့်လှစ်ခဲ့ပြီး ယင်းအဆောက်အအုံကို စာပေဗိမာန် Palace of Literature ဟု မြန်မာဆန်ဆန် ကျက်သရေရှိစွာ ပြောင်းလဲခေါ်ဝေါ်ခဲ့သည်။

၂၀၁၆ ခုနှစ်၊ သြဂုတ်လ ၂၆ ရက်တွင် စာပေဗိမာန်သည် ၆၉နှစ် ပြည့်မြောက်ခဲ့ပြီဖြစ်သည်။ ထို့ကြောင့် စာပေဗိမာန် ၆၉ နှစ်မြောက် နှစ်ပတ်လည်နေ့ အထိမ်းအမှတ်အခမ်းအနားကို ၂၆-၈-၂၀၁၆ ရက်တွင် စာပေဗိမာန်၌ ကျင်းပခဲ့ရာ နံနက် ၅း၀၀ နာရီတွင် ဒဂုံမြို့နယ်၊ စိန်ရတနာစာသင်တိုက်မှ သံဃာတော်များက စာပေဗိမာန် ဘုရားခန်းအတွင်းရှိ ဥဒ္ဒိဿစေတီဖြစ်သော ဘုရားဆင်းတုတော်များကို အနေကဇာတင်ကြသည်။ ထို့နောက် သံဃာတော်များအား အရုဏ်ဆွမ်းကပ်လှူကြပြီး စာတည်းမှူးချုပ်နှင့် ဝန်ထမ်းများက သံဃာတော်များထံမှ ငါးပါးသီလခံယူ ဆောက်တည်ကြ၍ ပရိတ်တရားတော်များ နာယူမူဇော်ကြသည်။ ထို့နောက် သံဃာတော်များအား ဝါဆိုသင်္ကန်းများ ဆက်ကပ်လှူဒါန်းပြီး လှူဒါန်းမှုအစုစုအတွက် ရေစက်သွန်းချ အမျှဝေကြသည်။

နေ့လည်ပိုင်းတွင် အခမ်းအနား ဆက်လက်ကျင်းပရာ ဖိတ်ကြားထားသော ဧည့်သည်တော်များနှင့်ဝန်ထမ်းများကို မုန့်ဟင်းခါးဖြင့် ဧည့်ခံကျွေးမွေးပြီး ပျော်ပွဲရွင်ပွဲများနှင့် ကံစမ်းမဲဖောက်ပေးခြင်းတို့ ဆောင်ရွက်ခဲ့ကြသည်။ အခမ်းအနားတွင် ဝန်ထမ်းများ၏ စာပေလက်ရာ "ရောင်စုံကမ္ဘာနံရံကပ်စာစောင်" ကို ပြသခဲ့ရာ အခမ်းအနားတက်ရောက်သူများက စိတ်ဝင်စားစွာ ဖတ်ရှုခဲ့ကြသည်။

မြန်မာနိုင်ငံဘာသာပြန်စာပေအသင်းကြီး စတင်တည်ထောင်စဉ်ကပင် ဘာသာပြန်လုပ်ငန်းနှင့် စာပေဖွံ့ဖြိုးရေးလုပ်ငန်းကို အားသွန်ခွန်စိုက် ကြိုးပမ်းဆောင်ရွက်ခဲ့သည်။ စာပေဗိမာန်ဟု အမည်ပြောင်းလဲခဲ့သော်လည်း စာပေဗိမာန်သည် ယင်းအစဉ်အလာကောင်းများကို ထိန်းသိမ်းအကောင်အထည်ဖော်လျက်ရှိသည်။ စာပေဗိမာန်မျိူးဆက်သစ်ဝန်ထမ်းများနှင့် ပြည်သူများက စာပေဗိမာန်၏ အစဉ်အလာကောင်းများကို အမှတ်တရ ရှိစိမ့်သောငှာ စာပေဗိမာန် နှစ်ပတ်လည်နေ့အထိမ်းအမှတ် အခမ်းအနားများကို အစဉ်အလာမပျက် နှစ်စဉ် ကျင်းပသွားမည်ဖြစ်သည်။